趙嘉懿行長城唔敢抱仔

模特兒趙嘉懿（Carrie）早前舉家到北京旅行，慶祝父親及兩歲大的囝囝Marcus生日，今次更是Marcus首度坐飛機，她大讚囝囝被其他乘客讚乖寶寶：「囝囝上到機就瞓，醒咗就好乖咁玩玩具，冇嘈住其他乘客，佢仲周圍同人揮手、打招呼。」
趙嘉懿（左起）與父母及姊姊行長城，囝囝則由外公抱實。
趙嘉懿（左起）與父母及姊姊行長城，囝囝則由外公抱實。

Carrie透露其胞姊在北京工作，今次亦順道探望對方，並住在其家中，而姊姊更安排行程及司機接送，參觀了鳥巢、故宮、萬里長城等名勝，玩得十分開心，她笑言：「今次好難得全家去旅行，返到香港都仲係好回味。我問囝囝鍾意北京定香港？佢話鍾意北京，因為姨媽（即Carrie胞姊）間屋好大，真係畀佢笑死。我哋五個大人一齊湊囝囝，行長城嘅時候，由爸爸同老公輪流抱住囝囝，反而我太論盡，佢哋驚我拗柴，唔敢畀我抱，我只係負責影相，所以最輕鬆係我。」

趙嘉懿與老公及囝囝齊齊外遊，不亦樂乎。
  • 趙嘉懿與老公及囝囝齊齊外遊，不亦樂乎。