黃貫中精神分裂 引警埋身
黃貫中（Paul）相隔6年將於7月13、14日假紅館舉行2場演唱會，在年底榮升「龍爸」的他未有帶同懷孕女友朱茵出席記者會，Paul表示：「佢粗身大細，都唔畀佢嚟啦，佢冇嘔仲成日都食，開始見肚，不過手腳仲好瘦，塊臉仲好尖。」但他開騷時，相信屆時挺住約6個月肚的朱茵定必捧場。
BB識揀音樂
問他可擔心強勁音樂會嘈親BB？他說：「唔擔心，成日都『轟』佢（BB）。（有冇同BB傾偈？）有畀音樂佢聽，佢都識揀音樂，因為佢鍾意嗰啲就有反應，暫時都未百分百知佢性別。」
早前Paul明顯發福，但昨日又變瘦，他稱覺得自己忙到有點精神分裂，除要籌備演唱會、錄新碟、電影配音、搵奶粉錢外，他又要裝修家居及照顧奄尖女友，不得不捱到瘦，他說：「佢（朱茵）7點要食快餐做早餐，我捱通宵到5點後，就坐喺快餐店門口等到6點幾買早餐畀佢食，快餐店啲人仲以為我咁早嚟『劈友』。」他又謂有朋友指他寓所的牆身太白對BB不好，故打算重新裝修，不怕犯大肚婆的裝修禁忌。
一個都攞命
Paul謂暫時未感到做爸爸的壓力，有朋友笑他現時尚可玩瀟灑，但「遲啲就知味道」，他笑說：「搞到我都好驚，（BB幫你吸金800萬可以生多個？）一個都攞我命啦，啲人話BB係嚟收我o架。」
Paul又說和女友未有再受身為基督徒未婚懷孕的質疑影響心情，皆因滿瀉的祝福令他倆感受到愛，他謂：「有次有位藍帽子行埋嚟，我仲以為佢查身份證，點知佢細細聲話恭喜我。」
文：音樂組