謝賢北上獲優待：警車開路
洗腳唔抹腳的謝賢（四哥），於多年前曾帶霆鋒及婷婷，到大陸體驗窮人生活，卻因朋友關係，獲特別優待，更有警車開路！
楊受成話我同錢有仇，一有錢就「fing」咗去，我舊時都搵好多錢，啲人就以為我「fing」啲錢，其實我係用喺家庭度。將啲錢使晒唔好咩？我唔會特別分配，鍾意點用就點用，所以我周身無Mon（Money）o架！我有錢就享受，所以依家好窮。之前係有兩間屋喺加拿大，一間霆鋒嫲嫲住，一間我哋移民嗰時住，最近都賣咗我哋住嗰間啦，太大啦，又用唔着。
財多仔女唔生性
不過我舊時真係有錢都唔識執唔係呃你，如果貪錢真係可以好有錢，但我又反而安慰自己，好彩我唔係好有錢啫，否則我兩個仔女一定係壞人呀！冇錢佢哋就話去奮鬥啫，大把錢實唔願做嘢！
有一年霆鋒14歲，婷婷12歲，諗住帶佢哋返大陸去見吓啲窮人，點知×街，一上到去警察警車幫手開路，又食皇帝餐住大酒店，上埋長城，完全冇機會畀我帶佢哋去見窮苦一面。我唔係有錢，但朋友關係，令佢兩個得到咁好嘅待遇，結果乜都睇唔到，仲覺得，嘩原來大陸咁樣呀？後尾我都有解釋番畀佢哋聽。所以話，如果我真係好有錢，多過頭嘅話，兩個仔女唔會咁生性。
唔怕得罪有錢佬
我唔係話得罪啲有錢仔，有幾多個成材呀係咪先？所以我對住有錢仔、富豪，我唔會拍馬屁o架。我係一個好直嘅人，見到邊個大富豪都同佢開玩笑，唔會向佢打躬作揖。
同埋富豪圈其實好窄，因為佢哋唔會同一般人打交道嘛，見嚟見去都係嗰幾個「老朋」。
口述：謝賢
筆錄：名人組