學友呻唔慣 陪女解失落

「張學友1/2世紀演唱會」從2010年12月30日展開世界巡唱，經過一年多創下146場的史無前例巡唱紀錄，昨晚於亞洲博覽會演唱最後一場。開騷前學友與經理人陳淑芬及工作人員特別進行拜神儀式，之後更與一早到場的過百歌迷握手和合照。對於巡唱即將結束，學友坦言早幾日已開始有失落感，因巡唱的生活慢慢變了習慣。

安排暑假活動

問到可會休息一段時間？學友笑言：「我會即時投入屋企嘅工作，幫兩個女安排下暑假。（去旅行？）唔去旅行，想同小朋友傾多啲偈。（有冇問兩個女意見？）問佢哋咪即係去旅行，去來去去都係嗰啲地方，我唔想，想安排佢哋上音樂班。（太太意見呢？）我返咗嚟就OK，佢就有得休息。」昨晚陳奕迅和導演劉偉強亦趕上「尾班車」，為學友最後一場巡唱專程捧場，兩人分別在微博放上與學友在後台的合照。

大談音樂節目

另外有傳now將製作類似勁歌金曲的音樂節目？學友謂：「音樂頒獎禮香港都唔少，我就覺得搞音樂節目嘅準則要攞得清楚，對市場健康冇所謂，但如只係攞自己嘅準則就有啲鬥氣。（健康嘅話唔介意亮相？）冇乜介唔介意，得閒先得，我三年先出一隻碟，等得我嚟節目都完囉。總之要對樂壇有幫助，如果又係靠關係先畀獎，咁就無謂，多個盞搞啦。」

文：音樂組