饒舌歌手咀爆陸永嫂 連詩雅16歲拍慾照
現年23歲歌手連詩雅（Shiga）和陸永老婆Rainah被爆慾照，她們跟o靚模許穎（Pheobe）的師弟Rapper K-Chek（曲赤）大批舌戰相在網上瘋傳，而當時的Shiga年僅16歲，曲赤則厚顏向本報坦認跟Shiga發生關係。陸永昨日則狂插曲赤為出碟犧牲其老婆和Shiga。
Shiga不但獲華納力捧，更憑電影《喜愛夜蒲》提名「最佳新演員」，雖然鎩羽而歸卻冇礙上位之路，怎知，昨日網上卻瘋傳一批她於16歲時跟曲赤的脷疊脷、吹耳、半裸攬抱相，甚至登上《東方新地》雜誌封面，玉女形象毀於一旦。據知，心情大受打擊的Shiga昨日仍強撐開工跟恭碩良拍廣告，其公司於今日召開記者會，消息指Shiga將親認跟曲赤的舊情！
慾照的另一女主角，則是組合農夫成員陸永的老婆Rainah，相中的她穿低胸裙坐曲赤大髀肉緊啜嘴；昨日記者致電陸永，他說：「老婆梗係唔開心，佢又唔係圈中人，老婆一早同我講曲赤追佢，啲相係3年前影，嗰晚飲大咗咀佢。」陸永強調老婆冇跟曲赤發生關係：「絕對冇，最多係咀，冇影響我哋感情。」
陸永狂寸曲赤想出碟故「發相」博出位：「照推理係佢做，咁做好蠢，我知佢想出碟，希望佢隻碟成功，我要問佢攞番宣傳費，犧牲咗我老婆同連詩雅，佢仲話自己係基督徒，佢真係『決志』－－缺乏智慧，應該出隻碟叫《虔誠基督徒》。」問會否跟曲赤絕交？陸永笑說：「從來冇交過，要從新認識。」昨晚有網友在陸永微博留言：「有人竟用自己的ex和人妻去hustle（上位）。」陸永回覆：「做hip hop就要hustle。」
曲赤認有親密關係
至於曲赤的微博沒有跟Shiga和陸永嫂的合照，反而有大批和Pheobe的親密相，曲赤接受記者電話訪問，強調跟陸永嫂冇拍拖，只是飲大了咀嘴，但就坦認Shiga是舊愛，問兩人有冇性關係？他說：「一定有拍拖做嘅關係，（當時Shiga夠唔夠秤？）一定夠秤。（有冇更激床照？）唔答，自己心情都低落，6月出碟擱置。」昨日記者就曲赤和連詩雅慾照一事致電Phoebe，一向合作的她竟潛水未有回覆。
文：音樂組