爆富豪開條件包養 趙哲妤：真係心動嘅
曾經歷家庭興衰的「中國小姐」趙哲妤（Uny），小時候住過三千呎豪宅，後來經歷破產、父母離異等，令她變得堅強獨立。入行後，即使有富豪向她送錢、送樓，她仍能抵抗心魔，堅拒被包養！
「在意人哋點睇我」
其實選中國小姐有好多複雜嘅地方，會遇到好多有錢佬。呢啲時候就要好好保謢自己，好好諗清楚。其實都有人想接近我，我開頭當佢普通男仔追我，但係佢竟然用金錢攻勢，同我講「你每個月用幾多幾多錢啦，我幫你畀」、「呢個係咪你經理人呀？你問佢開價幾多，我買你份約」，又話「你鍾意住邊度？即刻買層樓畀你」等等，其實都唔好話唔心動，哈哈。對一個廿幾歲，啱啱出嚟社會，冇乜點賺過錢嘅女仔嚟講，真係心動嘅。但係我會覺得自己真係唔鍾意，同埋我會在意人哋會點睇我。
嚇到即時走人
聽到嗰啲說話嗰陣，我好惡架，掉低對筷子就走咗，但其實我真係好驚，於是去問經理人點算好？佢同我講：「你放心啦，我以後都唔會畀你單獨同呢啲人相處。」我男朋友知道之後都好嬲，仲即刻鬧我經理人。當然佢都知我底線，一定唔會做呢啲嘢。我覺得其實係喺娛樂圈先會遇到啲咁嘅人，一個正常嘅大學生就唔會遇到喇。
感激同學助選
參選中國小姐嘅原因，係因為我當時就快大學畢業，同學就叫我試吓參加，當畀個機會自己。我都做咗part time模特兒一段日子，如果有機會都想試吓。不過嗰時忙參選又要返學，所以喺上堂嘅時候要偷偷地化妝。好彩同學都好好，會坐直啲幫我遮一遮，我就左手拎原子筆、右手拎眉筆，靜雞雞化妝；一打鐘就即刻衝去locker拎高踭鞋，再去搭的士。同學都好錫我，出街嗰陣如果有人認出我，佢哋會好保護我，仲成日都提我幾時要交功課，可以順利畢業，佢哋實在功不可沒！
男友撐出寫真
我同做生意嘅男朋友拍咗兩年幾拖，佢都好支持我選中國小姐，但當佢聽到我要上大陸後佢就驚啦，仲話要派兩個保鏢嚟保護我。其實男友好信任我，我之前出性感寫真，佢都只係叫我畀佢過目一下啲相先出寫真，不過最後我都冇畀佢睇，哈哈！其實依家我接比堅尼工作之前，我都會問過媽咪、問過佢嘅，so far我哋依家都好好呀！
歷盡家庭起跌
我屋企經歷都好多，曾經試過好有錢，嗰陣可以住三千呎嘅複式單位，又有幾個工人；但亦經歷過破產，返去住公屋。細個想學咩都有得學，聖誕節唔好話一份禮物啦，廿樣都買畀我！但破產後，我話要學小提琴，媽咪一句話唔得就唔得，嗰陣真係好唔開心，再之後就見到父母離婚，再各自結婚。我以前都係由工人照顧，媽咪一年有七個月唔喺香港，直至依家都成日唔喺度，但反而令我更加獨立。
考第一成轉捩點
不過其實我都曾經迷失過，中二、三嗰陣，成日都好唔鍾意媽咪，覺得佢成日都冇時間陪我；我就成日唔想返屋企，放學同啲朋友喺街上流連，唔鍾意讀書。後來媽咪幫我轉咗校，跟住我考到第一，成為我人生嘅轉捩點！因為有優越感，又覺得咁樣可以得到媽咪嘅讚賞，咁就驅使咗我去讀書，希望年年都考得好。而且呢啲嘢係相向嘅，媽咪又見到我轉變，我哋嘅關係就愈來愈好。就係呢啲經歷，令我更加珍惜同家人相處嘅時間。」
花20萬買個安心
原來Uny一直有駕車習慣，早前更豪花20萬港元購入愛車，成為車主行列。她表示：「因為以前住得好遠，所以一滿18歲，媽咪就要我考車牌。因為佢話夜晚返屋企好危險，之前都試過搭公共交通工具嘅時候畀人抽水。同埋我住嗰度比較偏僻同暗，如果唔係搭的士，要行一條好長嘅斜路上去，都幾危險，所以就決定買車。」
抓緊機會何妨一露
去年曾推出寫真集的Uny，當中不乏性感造型，難免被標籤為賣弄性感的「o靚模」，她坦言：「都擔心被定型，不過我知道自己做緊乜，唔想錯過任何機會。寫真只係一個渠道畀人認識我。其實出咗寫真集之後，我都冇乜接過啲好性感嘅工作。」她坦言不介意性感示人，只在乎意識健康與否。若一些高級品牌或時裝設計師要求她性感上陣，她亦樂於效勞，最重要是效果高貴大方。
口述：趙哲妤
筆錄：龔凱欣
攝影：吳文聰
化妝、髮型：Sharon Yeung
形象指導：KARL HUI
服裝：Sovereign Romance by Kev Yiu
場地：fasherati - Dresses & Gowns