陳自瑤出院 老公送波子
大前日誕下6磅2安士小B女的陳自瑤（Yoyo），經過兩日休養後，於昨日下午時分，在丈夫王浩信（Vincent）陪同下十指緊扣出院，恩愛非常，戴上黑超的Yoyo精神不俗，大抵開刀傷口尚未復原，故走路時有點緩慢，小B女則交由新任爸爸Vincent抱住，為免小B女雙眼受鎂光燈影響，二人全程都把愛女以衫仔蒙住面。
惡補駕駛技術
而曾揚言會送車給Yoyo作為獎勵的Vincent，就表示有意送波子跑車，Yoyo聞言即撒嬌︰「我唔要嗰啲吖！不過車係需要，本身有牌但冇揸，所以都會盡快惡補番。」至於二人可有為愛女取名？Vincent謂︰「仲未，李師傅畀咗好幾個靚名我哋揀，但未決定，所以叫做B女先，本來我都諗咗個好聽法文名，但畀太太鬧，話又長又難記喎！」Vincent更指老友陳敏之已認頭當小B女的契家姐。
對於小B女因臍帶纏頸而要提早剖腹，Yoyo不諱言當時擔心不已，她謂︰「喺入面纏咗幾個圈，隨時勒得太緊，驚有咩問題，為安全起見就早啲開刀，（個女要瞓箱？）都OK，佢都唔算超級細粒，檢查過所有嘢都健康，起碼都食到奶同瞓到先。」
斟洽瘦身工作
談到初任母親的感覺，Yoyo直言開心又奇妙，只要一看見小B女的可愛樣，她便感到很甜蜜，自然發出會心微笑，更指稍後會嘗試餵人奶，何時復工則有待坐完月才作打算，公司亦正為她斟洽一系列瘦身工作。
文︰影視組