陳嘉桓45度溝仔煞食
陳嘉桓因扭傷頸，故只可45度角望人，她笑言呢個甫士十分煞食，容易溝仔，並自封招牌笑容最使得；而再度發育的她，因身體長高1至2cm，怕太高冇人搵佢拍戲，影響了事業發展。
藝人陳嘉桓（Rose）、馬國明、杜宇航、黃德斌、吳千語、王馨平等前晚出席著名品牌Coach新店開幕活動，當中身穿白色透視裙的Rose表示做足安全措施，高人一等的她說：「高咗1至2cm，本身已經5呎9，驚只係做到model工作，怕太高冇人搵我拍戲，可以做show長腿角色，（性感？）露腰、腿都OK。（難搵男主角襯你？）全女班戲或做傷殘人士都得。」
她還透露早前在泰國坐車時扭傷頸部，並搞爛gag說：「依家興45度角望人，我淨係可以一邊面45度望，呢個甫士好煞食。（咁溝仔？）咁易過搭車扭親條頸，其實吸引人要有內在美，我招牌笑容最得。」
馬國明想畀人電
而擔任剪綵嘉賓的馬國明，被問到前女友胡定欣被封「新一代姣精」，他力撐對方：「宣傳劇集啫，（搵你做宣傳？）唔介意，唔太過分都OK，希望接到阿佘（佘詩曼）一姐棒，（胡定欣係姣精？）女藝人應該有，咁先吸引到男粉絲。（被電過？）你都講咗啦，（『電力』有冇阿佘咁勁？）未領教過。（呢期有冇畀人電？）我都想。」他還大讚對方在劇集《拳王》裏演聾啞角色，記者指題材是抄襲，他回應：「好多題材都已經做過，演出嚟好睇咪得。」
另外，問吳千語有否與「新進電王」馬國明過電？她說：「未交談，見到佢先。」她透露下月將開拍新戲，現仍在籌備中。
文：名人組