黃秋生：試過激到阿媽嘔血
黃秋生是圈中少見的「異類」，除了因為他敢言，更因他的侍母至孝。年初秋生在內地拍劇期間，接獲母親中風消息，即時心急如焚，就算要多番轉機，仍堅持趕返香港探望。外間不熟秋生為人的，總以為他愛爆粗問候別人母親，實則生性孝順的秋生也有鐵漢柔情一面，他將一連五日在此分享他的內心世界。
阿媽依家出咗院，暫時喺護老院住，間屋裝修好會接佢返屋企，會請多個工人照顧佢。阿媽年紀都大，我預咗佢中風後行唔番，或者隻手郁唔到，但如果要佢插住條喉唔知幾多年，對佢係一件好痛苦嘅事。阿媽依家狀況算係咁，最初我希望佢可以食番嘢就好開心，雖然佢依家半邊身郁唔到，但佢食得番嘢，仲食得好好、食得好多，我覺得算託賴。
阿媽精神好嘅時候，會笑吓，心情都OK，佢份人好達觀，我覺得佢依家每日就好似將過往嘅回憶拎出嚟，慢慢回味完再吞落肚，但佢心入面諗緊乜我就真係唔知。
裝修過間屋，請多個工人，係要使多好多錢，但唔可以諗錢嘅問題，有得使已經係好有福氣。
難忘全心愛護
我阿媽好錫我。我好細個已經冇老竇，細細個又走去寄宿。阿媽點錫我？我當然好深刻記得，深刻到講出嚟都會喊！但你睇我好似好孝順我阿媽，其實你睇唔見我點激佢，我激佢激咗幾廿年。
以前我係好少探阿媽，有時兩個禮拜至飲一次茶，每次我走，睇見佢雙眼都係好依依不捨。呢個世界邊會有父母唔掛住自己嘅仔女？只有仔女大個咗，唔再掛住父母，因為仔女嘅生活太多姿多采，工作、拍拖、娛樂……直至到某個年齡、某一日，個仔女嘅生活唔再精彩，佢哋就會諗番起父母。
阿媽呢次中風，畀咗個機會我要強制自己每日去探佢，雖然我探佢，佢未必知道；探完佢，佢亦未必記得。
相見好同住難
我40歲前一直同阿媽住，但一齊住嘅時間成日有衝突，佢成日驚我未食嘢，走嚟拍我房門，有時我睇緊書、瞓緊覺，真係會好忟！拍戲好辛苦，我容許唔到休息仲有人喺側邊騷擾，我有大聲喝過我阿媽，仲試過激到阿媽嘔血，每次大聲話完佢，自己都好後悔，自己都好唔明：人點解要傷害自己愛嘅人又傷害埋自己，嚟證實關係嘅存在？不過次次後悔完，下次我又再喝佢。
十年變出耐性
呢十幾年我算改變咗好多，可能人老咗，我依家變得好有耐性，再冇大聲喝過阿媽一句，不過我暫時都仲未可以搬返去同阿媽一齊住，我諗除非我唔做嘢、唔睇書，只要一日仲要搵食，我都接受唔到同人一齊住。
口述：黃秋生 筆錄：影視組 攝影：司徒國榮 場地：Monster Sushi