謝賢優良基因 捐精拍賣

謝賢(四哥)和郭少芸為「古漢養生精」擔任代言人,昨並進行拍攝廣告,四哥覺得此藥十分有效,更笑言食後除了身體外,連心境也變得年輕。問他會否想跟女友Coco生BB?他即說:「仲生得出?唔生得喇嘛。」他笑言自己基因優良很值錢:「你睇吓霆鋒同婷婷就知啦!」他更笑說要將基因優良的精子放進冰櫃,假以時日拿出來拍賣。問他是否將拍賣所得用來做善事,他說:「做善事唔使喇啩,咁用一半啦。」

唔理霆鋒私生活

四哥又坦言不會因心境變年輕而跟o靚模拍拖,他說:「同o靚模都冇感情,玩玩吓唔好啦,依家呢個(Coco)最後生o架啦,都同佢行咗8年,你哋(記者)要錫住佢呀。(咁你有冇同過o靚模一齊?)我梗係話你聽冇啦,我依家都唔蒲,況且都沉晒落海底,蒲唔起啦。」他還表示女友Coco已完成學業返港,問他Coco讀甚麼,四哥說:「家政……點樣去維護一段感情囉。(咁即係兩性關係導師?)咩嚟?(你會45度望人,同人講嘢?)黐線嘅,咁冇禮貌同冇風度嘅嘢我係唔會做。」

談到兒子霆鋒跟楊冪的緋聞,四哥更是搞笑:「人不風流枉少年,不過風流好喇,唔好下流就得。」問到會否幫霆鋒找女友時,四哥竟謂:「我同佢唔係好熟,佢嘅私生活我理唔到。」

文:影視組