閻奕格認保守 谷胸怕醜
參加台灣《超級星光大道》進身樂壇的閻奕格（Janice）前晚出席音樂會綵排，因航班延誤搞到遲到半小時，Janice甫見面即向傳媒耍冧道歉：「對唔住要大家等。」以谷胸透視喱士長裙襯四吋高踭鞋亮相的她步步為營，為免走光不斷用手拉扯裙邊，她說：「我係好保守，今次已經係最性感。」
緊張失眠
記者取笑她成功谷胸？怕醜的Janice面紅兼尷尬說：「係咩？我盡量用手遮住（指胸部）。（可以露多啲腳？）遲啲先啦。」首度來港開騷的Janice坦言緊張到失眠，她說：「成晚瞓唔着，超級緊張，完全冇諗過咁多人支持自己，喺台灣開過一場八百人，今次兩場加埋成三千人。」
唔靠父母
由於其父親是香港中樂團總指揮閻惠昌、母親是古箏演奏家熊岳，問到有否請教父母唱歌技巧？Janice說：「冇，好多嘢都係自己學。」她透露為遷就港迷特別揀了很多廣東歌，她說：「揀歌係一件開心事，今次會唱好多廣東歌。」
文：音樂組