杜汶澤教床技 陳偉霆虛心學
陳偉霆（William）與蔡卓妍（阿Sa）被踢爆拍拖時，他不懂如何面對排山倒海的負面新聞，搞到思緒混亂，幸當時得到前輩杜汶澤一言驚醒，令他茅塞頓開。兩個年紀相差一大截的麻甩佬，見面當然講女，阿澤更不吝嗇跟William分享拍做愛戲的經驗，引人入「性」。
W：陳偉霆 杜：杜汶澤
W：繼G.E.M.、曾國祥同詩雅之後，你係我「唱雙簧」最後一集嘉賓，好多謝你幫手。
杜（八卦地）：你同G.E.M.傳過緋聞，唔怕阿Sa唔開心？
W（信心十足）：假之嘛，又唔係真，而且係好耐之前嘅事，所以冇事嘅。
杜：你成日同靚女合作，你又咁靚仔，阿Sa會唔會（目及）得你好緊？
W：因為佢嘅質素都唔差，所以佢都幾放鬆畀我嘅。
杜：佢好有自信可以擊退狂蜂浪蝶，騎騎騎！
W：咁唔好再講佢啦！自己認識杜生當然睇你啲戲，留有深刻印象，之後一齊拍咗兩部戲，你係一個良師，我面對你要扮到好專業。
杜：依家你冇嘢驚啦！由詩雅殺到落去夏文汐、周慧敏、吳家麗。我反而特別欣賞你喺《出軌的女人》做雙面人角色，拿捏得好準確，加上你嗰排公、私事都繁忙，咁情況下做到呢個效果算OK。
真正男人懶理閒言
W：拍呢部戲咁啱係我同阿Sa公開嗰段時間，開咗戲個幾星期，真係好慘！因為自己性格係收埋得好犀利，唔知點面對呢啲新聞，當時個人思緒好混亂，記得有次拍戲時你同我講：「冇嘢o架，公開咗好舒服，依家唔興地下情。」一個前輩同我講「冇嘢o架」，我就覺得冇嘢，你嗰句說話作用力好犀利。其實嗰時我冇同任何人傾訴，但你絕對睇到我嘅問題，首先你開解令我舒服，再引導我入戲教我點做，雖然你講得好玄，但我明白要投入先冇障礙，做人應該冇底線，想做就去做，呢樣嘢應用喺我嘅感情生活，我覺得好啱用。人哋點睇你唔使理，又唔會死嘅。
杜：其實感情係好脆弱，搵到一個你鍾意而佢又鍾意你嘅人唔容易，當然社會始終都係勢利，唔通要我係天王巨星，女友係茄喱啡咩！我覺得一個真正大男人就算人哋點樣話你，都唔會為閒言閒語放棄呢段感情，如果連呢樣都克服唔到，唔好話做藝人，做人都好痛苦！係咪先？我又唔係乜影帝級人馬，只係喺呢行時間比你長，我都係因為跟好多出色演員合作過，先學到好多嘢，佢哋冇吝嗇過將經驗同後輩分享，薪火相傳我都唔應該收埋呢啲經驗。
拍親熱戲冇人安慰
陳偉霆和杜汶澤因電影結緣，兩個麻甩佬樂於分享拍性愛場面的經驗。
W：因為自己係硬衝派，拍《前度》時裏面好多性愛場面，大家將焦點擺喺詩雅身上，喺女仔角度佢係大膽啲，因為佢要除衫，大家都要安慰佢，喺嗰刻諗點解冇人安慰我呢？
杜：睇你扮到好正常，好似好鍾意拍呢啲嘢，但我知其實好難頂。
W：我會驚囉，始終經驗好少。
杜：你驚乜呢？我成日拍呢啲嘢，我最驚對手以為我博懵！你知啦，你嚟做嘢啫，可能有啲人唔係嚟做嘢，以為所有人同佢一樣嚟玩嘢，所以拍呢啲戲最怕對手覺得你博懵，否則我冇乜嘢驚，就算有反應都唔尷尬。
W：哈哈哈！
杜（理直氣壯）：你拍戲時如果傷心會喊，眼淚都係真o架！如果拍呢啲激情戲，過程當中有生理反應好正常吖！其實你要睇劇情，一啲好輕巧嘅場面，例如兩公婆返工啄兩嘢好正常，但如果男主角成條脷塞入女主角個口，繼而滾動打茄輪，咁就好怪囉！做呢啲戲最重要係對手，如果對手睇法唔同，拍之前要好好溝通。
放低底線打好基礎
W：我就唔係呢個情形，因為詩雅好專業，佢係沉醉電影世界嘅女演員，見親佢就講戲，同佢合作完全冇諗過抽水，或者佢抽我水，哈哈。
杜：佢唔會抽你水，我作為監製冷眼旁觀，你兩個係嚟做嘢。詩雅最大障礙係佢好乖女，投入角色要再開拓生活，反而男仔就容易啲，未必要好壞先做到演員，但女仔就要開放啲，上次你兩個表現得好好吖。
W：同你第二次合作係《出軌的女人》，有《前度》打好基礎，可以放開晒自己去拍，慢慢去放低我嘅底線。
杜（抵死地）：你有咗一次勇猛經驗後，呢次連夏文汐都唔放過，激情戲佢算師傅級。我好鍾意新人拍床戲，如果連床戲咁尷尬都過到，將自我消滅就可以進入電影世界。聽聞王家衛拍《春光乍洩》，第一日就要張國榮同梁朝偉拍最激烈嘅床戲，拍完之後就深深相信自己係同性戀，所以我好贊成後生拍床戲，但有時睇到啲藝人講嘢又覺得好好笑，成日話如果有好劇本同好導演如王家衛、李安就唔介意，但王家衛未必拍你呢！
非一般前輩
相比於杜汶澤的口若懸河，愛收埋自己的William顯得虛心受教，但阿澤搞笑地稱亦在陳偉霆身上學識扮鎮定。阿澤說：「你驚唔畀人知，我驚就好多人睇得出，咁好蝕底。」能講出向後輩學習，完全是非一般的前輩，難怪William謂當日抱着一試心態，沒想到對方一口應承跟他做訪問，簡直驚喜萬分。
採訪：音樂組 攝影：黎志輝
杜汶澤 髮型：James Lee@Hair 化妝：小白
陳偉霆 髮型：Davy@Chin.G 化妝：Khaki Yan 服裝：Paul & Joe