詩雅初見陳偉霆勁驚
師兄愛師妹這條老土方程式已經不適合Y世代，陳偉霆就反傳統戀上師姐蔡卓妍，反而對口中的清純靚女，兼曾合作拍做愛戲的師妹詩雅卻零感覺，甚至踢爆詩雅唱歌會嘔的（火羅）爆瘀事，難怪詩雅對他的第一印象，就只有一個驚字！
W：陳偉霆 詩：詩雅
詩：第一次見你好驚，覺得你好惡，當時我哋坐埋一架車，但你唔講嘢。
W：我平時係唔講嘢，一講嘢就好多嘢講，我係純天蠍座嘅人，好多人唔熟我就會有距離感，熟咗知我係一個好低能嘅朋友。
詩：你有時真係幾低能，無端端可以唔出聲好COOL，但無端端又可以好多嘢講，好極端。
W：大部分天蠍座人都係咁，你幾時覺得我唔惡，係咪熟咗之後呢？
詩：你落車已經知啦，因為你同經理人講嘢，一講嘢已經唔惡。
W：我對你第一個印象係睇《四葉草》，覺得你好似大S（徐熙媛），好多朋友都話你好純，開始留意你，之後你加入公司，最深刻印象係有次萬聖節PARTY，我唔開名邊啲藝人啦，佢哋話你真係幾靚喎。
詩：（開心地）：邊個呀？
W：我唔講，總之有同公司與唔同公司嘅藝人。
詩：（八卦）：咁你有冇諗過追我？
W：（睩大眼）：梗係冇啦，第一眼見到靚女要追咪唔得掂好忙，日日都要追，坦白講呢行見到靚嘢實在太多，作為男仔見到清純靚女會加分，呢樣好正常，但要追一定冇呢個心態，每日見住唔同人，了解後感覺最緊要，而且識咗你之後，覺得你係一個比較低能、可愛、得意嘅朋友，我哋性格有啲似，不過你對人nice啲，因為成日笑。
性愛場面加深認識
William和詩雅曾合作拍電影《愛出貓》和《前度》，他們在《前度》有場性愛鏡頭，詩雅要裸背上陣，令兩人感情大躍進。
W：拍親熱鏡頭男仔冇蝕底，一定係女仔蝕底，你嘅大膽程度我都驚，我哋都係新人要互相學習，我不斷觀察你，發覺我哋有啲似，玩嘅時候好低能，但一入戲成個人落咗閘，我覺得你真係好專業，拍喊戲前會匿埋聽歌，尤其係我哋呢班young line藝人面對市場壓力幾大，當有一個好機會要好好把握，你絕對把握得好好，唔會hea住做，每場戲都好認真。
詩：其實《前度》真係我哋click位，令我更加深入認識你，第一個感覺你真係非常gentlemen，令我好放心、可以100%信任，一定唔會博懵，拍完之後覺得你呢個男演員好好，係好男人、好專業，第二個感覺你好勤力，拍完嘢你會話去做gym、錄音，其實已經好攰，兩日冇瞓，但個樣仲好陽光，令我覺得你好犀利。
唱歌麻麻唔敢聽番
William歌影雙線發展，但詩雅卻專注拍戲對唱歌零興趣，還被William踢爆瘀事。
W：你有冇興趣唱歌？
詩：唔得，太驚！
W：（抵死地）：我聽過你錄音會嘔，好低能，哈哈！
詩：（尷尬）：我真係太驚，嗰時啱啱入行，公司叫我試吓，去錄音室錄一首歌，我唱咗一句之後話唔好意思想去廁所，即刻衝咗入廁所嘔，唔知自己係太緊張定唱得太難聽，我對自己唱歌好冇自信，奈何同洪卓立錄咗首合唱歌，真係唔想再聽番，好恐怖，你知道之後特登喺架車度播，嗰次我激到癲咗，你記唔記得吖？
W：（取笑）：你發脾氣嘛。
詩：我冇發脾氣，落車返屋企之嘛，你好過分，我落車都唔放過我，仲要播到好大聲，全村都聽到，我要衝番落樓，我想喊呀，你好衰！我唔敢聽番自己把聲，有啲討厭自己，會毛管戙，女仔應該好似雀仔咁好聽，但我把聲好怪。
W：我要澄清吓，我播嗰首係mix咗，其實冇事，幾好聽吖，係你話唔好聽啫，不如即場表現吓。
詩：唔好逼我，我會嘔。
拍戲投入黑幫世界
W：咁你夠唔夠膽睇番自己啲戲？
詩：戲會好啲，我會睇番。
W：好簡單，你鍾意嗰樣嘢會睇，逃避、驚就唔睇，你嘅路線好清晰，演員就係演員，反而我就辛苦啲，好想演一部好戲，但轉頭又要做唱片宣傳，唔可以畀人覺得演員去唱歌，做戲又唔可以畀人覺得歌手去做戲，真係好難定位。
詩：我都覺得好難，見你拍戲要投入角色，但拍拍吓要抽幾個鐘去唱歌變番William，你好犀利。
W：所以我同經理人講，拍戲期間盡量唔好有唱歌或其他工作，尤其依家要拍部黑社會戲，盡量令自己投入黑幫世界，我唔可以帶住黑幫心態出嚟唱歌，會嚇親人，咁你點面對壓力？
詩：我好渣，到依家都唔係好識，唯一令我覺得開心就係動物同小朋友，見到佢哋好快笑番，呢兩樣嘢可以幫到我。
W：我之前會搵朋友傾偈，或者做運動減壓，但依家係乜都唔做，自己喺思維上解決壓力，尤其呢幾年面對唔同壓力，每次都好似大禍臨頭，就快玩完，但回頭一望，之前所有大禍臨頭都可以迎刃而解。
顧及阿Sa要避嫌
陳偉霆和詩雅雖然同一經理人公司，合作了兩部戲，但從沒如朋友般約會，他謂反而喜歡這種好耐冇見，但做戲時會好了解對方的火花，惟不知背後的另一原因，會否是陳偉霆早已名草有主，所以要避嫌呢？難怪詩雅大讚他是一個好男人了。
詩雅 髮型：Zap@Xenter 化妝：Meegan 服裝：A.T
陳偉霆 髮型：Davy@Chin.G 化妝：Khaki Yan
採訪：音樂組
攝影：劉智源
場地：Stormies