唐寧撇低囝囝 過戲癮
落實簽約効力王維基的藝人唐寧，稍後將正式投入新公司的劇集拍攝工作，並會在一部劇內一人分飾多角，令向來愛挑戰的她大呼過足戲癮！
離開無綫多年的藝人唐寧（Leila），自由身後主力舞台劇及獨立電影拍攝工作，直至近日轉投王維基後才再度踏足電視台拍劇。雖然很多人眼中，童星出身的Leila經驗老到，但她卻表示再次投入拍劇讓她有點緊張：「因為始終有段長時間無拍本地電視劇，要慢慢適應番個節奏，加上套劇好有挑戰性。因為套劇入面有好多戲中戲，所以我會一次過飾演好多個唔同嘅角色，呢個創作意念好大膽，我有信心今次一定會過足戲癮！」
似精神分裂
而最近憑舞台劇《關愛》入圍正劇組女主角提名的Leila，之前亦曾憑《爆谷殺人狂》入圍鬧劇組女主角提名，對於再度備受業界賞識，Leila開心地表示：「呢套劇我真係好畀心機做，同以往嘅角色有好大分別，因為呢套係一套好沉重，好內斂嘅劇，所以我用咗好多時間去揣摩個角色。我記得拍嗰陣啱啱生完俊仔，除咗成日掛住個仔好辛苦外，由於我另外又接咗一部搞笑嘅舞台劇，變成時喊時笑咁，真係好精神分裂。」
唔重視獎項
由於這次對手都是資深舞台劇演員，Leila坦言獲獎信心只有一半：「我不嬲都唔重視獎項，有入圍已經係肯定，當然唔恨攞就呃你，因為攞到嘅話，係一個里程碑。」
文：影視組
場地：ifc
服裝：Miss Sixty