姚子羚詐傻納福 無限發揮
姚子羚一向演開「花瓶」角色，發揮被局限。但早前她演技開竅，於劇集《我的如意狼君》終被認同，近期接連被監製睇中扮演「傻婆」，發揮空間大增，或許姚子羚能憑「詐傻納福」成功出位。
無綫藝員姚子羚在剛完成的劇集《女警愛作戰》飾演精神有問題的女賊，與扮演警察的周麗淇大鬥法，由內到外皆有突破。子羚說：「造型上都未試過咁污糟邋遢，為咗神似，連手指甲都要塗黑邊，膚色亦要靠化妝塗黑。」
狂聽慘情歌
為演好失常角色，子羚每次開工前要培養好低落情緒。她說：「開工之前都會狂聽慘情歌，同埋唔可以同同事講笑，盡量令自己情緒低沉，令自己唔係好正常。」問會否難以抽離角色﹖她說：「咁又唔會，因為戲份唔算好多，都係結尾幾集，所以都抽離到。反而收工之後就要花一輪工夫去清理化妝。」
性格好硬淨
無獨有偶，最近又有監製邀子羚演失常角色。她說：「再做傻婆都OK，其實唔易做，點樣畀人覺得你係傻，係冇一個標準，但亦都係有無限嘅可能性，角色嘅自由度大好多。反而唔鍾意做楚楚可憐嘅角色，一來做得太多，二來我外表雖然似好柔弱，但我性格實情係好硬淨，外表同內心嘅反差好大。」
文：影視組
攝：劉智源
場地：ELCID