祖兒:對佢情史 冇興趣

樂壇天后容祖兒前晚為代言品牌行騷,提到老闆楊受成出自傳,祖兒大讚老闆性格敢作敢為,秉承自傳精神。提到楊生自爆情史,尊重老闆的祖兒謂:「對佢以往嘅情史我真係冇乜興趣。」

祖兒事隔十多年再為bossini品牌任代言人,前晚頭戴粉紅巨型玫瑰花行騷,非常搶鏡。現場有穿緊身上衣和短裙的模特兒「飛釘」演繹,同樣穿緊身上衣的祖兒則未見有「凸」出效果。

處女行騷分外小心

提到有女模「飛釘」演出,祖兒笑言:「飛釘就要加碼(加酬金)啦!咁我作為一個唔係咁專業嘅Model去行,要送多兩粒釘就唔多掂囉。」她又謂今次是處女行Catwalk,穿五、六吋高跟鞋行騷時分外小心。

對於老闆楊受成推出自傳,祖兒坦言未睇,但很有興趣閱讀。問最有興趣哪部分?她謂:「成本都有興趣,尤其老闆後生個樣同佢囝囝個樣一樣。老闆嘅人生好傳奇,大起大落,應該有好多大家唔知嘅故事。」祖兒又指老闆的自傳內有提到她,但其他內容未有透露。

效法楊生分享歷史

問到是否對楊生情史最有興趣?祖兒謂:「OK啦,始終佢係我老闆要尊重佢,佢自己講就OK,但我去講就唔係太好。(唔敢講?)唔係唔敢,公眾對每個人嘅情史都會好奇,對佢以往嘅情史我真係冇乜興趣,因為呢幾日啲報道都講呢啲嘢,但都覺得幾大膽,秉承咗自傳嘅精神,敢作敢為講人生嘅事,令我好Surprise。」

將來可會效法老闆出自傳?祖兒說:「如果過去咗嘅歷史有發生過咁精彩嘅橋段,我都唔介意分享吓。」

文:音樂組