教祖兒買樓 霆鋒呷醋

楊：我唔使靠佢兩個搵飯食，叫做有小小成就，好富裕，佢哋同我搵幾多錢都好，我十倍畀番佢都冇所謂。霆鋒祖兒共通優點係唔怕蝕底，祖兒從未試過問做呢單有幾錢、做幾耐。最近有單Job酬勞三十萬，但佢話辛苦唔做！嘩！佢依家真係有錢！

容：吓？我幾時講過？

謝：老闆話雖然初初聽到覺得怪怪哋，但其實係開心。

楊：啱！唔通想啲伙記日日跑山借錢？聽到霆鋒買樓買舖祖兒掃豪宅，我都開心！如果話佢阿媽要借錢交租，你話做老闆幾冇癮？

　　所以我叫旗下藝人都要買樓，人最緊要有個殼，有間屋個心會定，先買樓住，跟住買樓收租，霆鋒最叻買好多，買咗擺花街成條街咁滯，係擺花街王！

容：我渣啲！記得《我的驕傲》未出前，老闆話有好盤想介紹我。

謝：（肉緊）你打畀我嘛！老闆唔會話我知呢啲嘢！已經話你知幾次，我就一次都冇，佢唔錫我！

楊：霆鋒有專人同佢搵樓，佢真係好多錢，如果佢再有錢啲、爬我頭點算？我不知幾驚！（語畢三人笑作一團）

容：（高聲詐嬌瞄向霆鋒）你咁醒，我咁蠢！老闆話個盤好好，但我擔心咗七日最後冇買到！因為我當時又肥，個人未係好得……

謝：（陰陰嘴笑寸祖兒）即係依家不得了喇係咪？

容：好少少啦！當時真係好擔心，個盤喺舂坎角獨立屋花園洋房，講緊係二千幾萬。

楊：係我公司起。我話如果你冇錢可以借畀你，送裝修畀你。

容：我如果失聲點算？咁就乜都冇！所以最後唔制！

楊：依家間屋起碼值兩三億，祖兒本來話扑錘，但開心咗兩晚，之後五晚又擔心到瞓唔着，最後推咗我！不過都好，如果佢買咗，依家好有錢，就唔會做嘢！

容：又唔係喎！人嘅本性係唔會變。做嘢係以工作性質為大前提，唔係為錢。老闆笑我啫，佢明嘅！