鍾景輝開荒牛難忘打風

香港戲劇之父鍾景輝(King Sir)即將推出自傳,King Sir笑指當年為理想懶理飯碗,毅然遠赴美國學藝,他說:「自己都冇把握搵到食,好多謝爸爸冇反對。」回流後屢任開荒牛的King Sir,笑言任職電視台讓他最難忘的是要應付打風。

畢生貢獻於舞台藝術的King Sir,即將推出自傳《寬實清和.鍾景輝》,十三歲便開始演話劇的King Sir,當年為興趣遠赴美國耶魯大學戲劇學院修讀碩士課程,目的是為了學習西方教授演員學戲的方法,望學成歸來推動香港藝術發展。King Sir說:「五十年代香港連大會堂都未有,走去耶魯讀戲劇,返嚟都冇把握搵到食,純粹為追求興趣,好多謝爸爸,同埋屋企人從來冇反對,我先可以追尋到理想。」

King Sir學成回港後,在演藝圈不斷扮演開荒牛的角色,先後效力剛開台的無綫及亞視,問到King Sir當年在電視台有否難忘事?他說:「去咗演藝學院都掛住喺電視台嘅應急情況,好似有啲災難事故,每年幾次打風,都要趕返電視台處理節目安排。」

康梓泠代筆有壓力

而為King Sir寫自傳的作者康梓泠,對於能以誠意打動不認識的King Sir大感幸運,他說:「King Sir好肯畀機會有熱誠嘅人,所以畀咗機會我呢個小朋友。」康先生又透露寫自傳壓力大,幸獲King Sir鼓勵:「佢冇話題唔講得,仲畀咗好多意見我。」

採訪:影視組