谷祖琳8月做媽咪期待再佗B
娛樂圈又多添一位龍年準媽媽！結婚年多的谷祖琳（小谷）與從事眼鏡商人老公劉先生「造人」成功，昨晨現身山頂慈善行承認有喜5個月，更坦言很享受懷孕感覺，一胎未完，小谷已期待第二胎的來臨！
昨日谷祖琳、謝安琪（Kay）、Shine和谷德昭為香港思覺失調學會（基金）於山頂出席「2012 FitMind慈善行」活動，近年專心打理糖水舖的小谷，早說過有意生龍B，昨日小谷叔叔谷德昭在台上踢爆她有喜，小谷大方承認已有5個月身孕，預產期為今年8月，暫未知胎兒性別：「其實仔女都冇所謂，但就覺得老公鍾意女多啲。」
仍回店打理生意
小谷坦言是次懷孕比計劃早了數月：「第一個月未知自己有咗，仲返內地拍戲，演忍者跳來跳去！」至於首次佗B，小谷稱第一個月情緒較起伏，幸沒作嘔或口味大變：「幾enjoy大肚，因為可以大晒幾開心o架，所以都好期待再生第二胎。」雖然身懷六甲，但小谷仍有返糖水舖打理生意，只是很少再落手落腳幫手，產後亦會繼續工作及為糖水舖開分店，不會因生B打亂工作計劃。
Kay唔心急解約
Kay則稱面對壓力比以前叻很多，有傳環球要求四百萬解約費？Kay謂：「幾多錢不便透露，數目唔大亦唔細。（要你幾時答覆？）咁又冇。（問題未解環球不會幫你接工作？）呢個你要問環球，但打後工作都好滿，所以唔心急作決定，唔想草草解決。」至於Kay經理人夏森美稱與環球都想尋找解決方法，因未有共識而拖拉中，若最終未能解決，不排除繼續合作，亦不擔心Kay因而被雪藏。Shine兩子則稱已為十周年的音樂會首次合作創作新曲，有意交由黃偉文為新歌填詞。
文：音樂組