胡楓：寶珠捱到喊
陳寶珠當年拍過不少粵語片，合作男星除呂奇外，還有胡楓（修哥）、謝賢等。修哥稱與寶珠由童星開始合作：「佢細個演過我個女，又試過扮男裝演我個仔，後來大個咗做少女戲，我哋就做情侶，合作真係唔少，佢當年好受歡迎，我哋都好啱傾！（有冇八卦佢緋聞？）我唔會咁八卦嘅！」
由於寶珠當年片約不斷，日拍夜拍要在片場瞓，冇得返屋企，修哥坦言當時寶珠忙到不堪，還大爆對方捱到喊：「嗰朝我喺隔籬廠收工，都天光七點，經過廠見到寶珠，佢捱到喊！嗰時天氣好熱，佢應該捱咗好多晚通宵，又束起個頭着古裝，的確好辛苦，我咪安慰佢，叫佢唔好喊囉！」
至於另一位對手謝賢，他表示當年只與寶珠合作過一套電影《黑玫瑰》：「呢套戲講打，我覺得我哋打得唔好囉！不過以前啲嘢我唔記得晒，我只記得依家嘅嘢咋！（印象？）咁就梗係好啦！」