陳寶珠棄情：畀我dry落去
「陳寶珠嚟啦！」傳奇的影迷公主陳寶珠，拍攝電影逾二百部，魅力橫跨半世紀，但感情生活卻十分低調。由當年與粵語片男星呂奇交往，遭養母宮粉紅阻止，到後來與楊占美離婚收場，寶珠可算是現實版《煙雨紅船》中，寧選粵劇而甘棄愛情的靚俏佳，寶珠笑言即使dry爆餘生，也無怨無悔。寶珠將一連五日與讀者分享她鮮為人知的一面。
可能我份人比較遲鈍啲，唔似得呢一代啲後生仔女，細細個就埕埕塔塔，見兩次面就話上床，真係嚇死人，我當年做女嗰陣根本都唔知乜嘢叫拍拖、乜嘢叫拖手！我啲朋友仲笑我，24、25歲人都未拍過拖，咁都係因為我太鍾意演戲嘞！
不反叛只遵從
就算當年同呂奇交往，都只係因為有間公司簽我，而呂奇亦都係嗰間公司嘅演員，咁我拍嗰間公司嘅戲，就自然一定係同呂奇合作，叫做比較同佢交往多啲囉，同其他啲演員就冇咁多交往，可能因為咁，傾得埋一啲。我媽咪係個好敏感嘅人，佢好驚我哋拍拖，佢覺得如果我一旦拍拖，就會冇心機拍戲，所以唔好話呂奇，只要有任何一個男人埋我身咋，媽咪都會唔開心，會第一時間阻止。
我有冇反叛？有冇逆媽咪意？我都唔知乜嘢叫「反叛」，亦都從未聽過「反叛」呢兩個字，我哋嗰個年代，喺字典度係冇「反叛」，只有「遵從」。所以就算我後生時比較硬頸，但我都冇嬲媽咪阻止我同呂奇交往，冇所謂啦，因為我鍾意拍戲，而且我知媽咪咁做係為咗我好。
感情係好講緣分嘅，我離咗婚都咁多年咯，傳媒曾經傳我同權哥（劉玉權）嘅緋聞，但權哥只係一個我好尊敬、好尊敬嘅朋友，大家都好尊重佢。
冇機會識異性
有時傳媒對我惡意中傷，經經（兒子楊天經）都會好嬲，佢見到邊個對我唔好，佢都對嗰啲人唔好，雖然天經冇講出口，但其實佢都唔介意我再發展感情，緣分要嚟嘅話，我唔會抗拒，不過我都幾十歲人啦，平日又唔應酬，根本都冇可能識到人，感情喎，你話點發展呢？依家啲傳媒咪好喜歡話人dry嘅，所以咪畀我繼續dry落去囉！
Profile
陳寶珠原名何佩勤，1946年12月10日生，16兄弟姊妹中排第8，4歲時被名伶陳非儂及宮粉紅收養，7歲演京劇嶄露鋒芒，14歲獲任劍輝及白雪仙收為徒，至72年暫別戲台。1958年寶珠開展燦爛銀色事業，66年奠定「影迷公主」地位，至70年赴美求學前，拍片逾二百齣。1998年，寶珠出山演出舞台劇《劍雪浮生》，創下一百場驕人紀錄，下月將於文化中心演出視為粵劇生涯代表作的《紅樓夢》。
口述：陳寶珠 筆錄：影視組
場地：港島海逸君綽酒店