許亦妮母遭扑頭險死東莞
內地治安欠佳，罪案肆虐，扑頭黨猖狂！應屆港姐季軍許亦妮母親日前在東莞疑上錯賊車，手袋被搶之餘，更遭扑頭即場「爆缸」！許亦妮直斥內地人視生命為無物，冷漠無情，令母親差點險死東莞！
近年內地發展蓬勃，不少港人人都愛北上做生意搵人仔。應屆港姐許亦妮母親於內地經營美容生意，經常往返大陸，日前就不幸在港商雲集兼有「罪惡城」之稱的東莞遇劫，財物被奪去更滿身傷痕，身心受創，慘不忍睹！
做美容生意
前晚應屆港姐季軍許亦妮、國際親善小姐梁麗翹及中華小姐冠軍張曦雯一同出席保良局慈善餐舞會。期間許亦妮向傳媒申訴，自爆母親本月15日在東莞遇扑頭黨的悲慘經歷。她說：「媽咪喺東莞做美容生意，所以成日都要返大陸；嗰日佢一個人上去搵個朋友，其實媽咪當時都懷疑上咗架賊車，因為佢一上車，個的士司機就講電話，仲要講我媽咪唔識聽嘅方言，之後落車就被人扑！」許亦妮形容賊人個子不高，故剛好扑到母親後腦，許母登時頭破血流，期間亦有和賊人糾纏，致周身瘀傷兼臉部腫脹，賊人最後成功搶走手袋，逃之夭夭。
許亦妮愈說愈激動，直斥賊人毫無血性，亦覺得當地人冷漠無情。她說：「其實我媽咪被扑之後，已經幾乎想暈，佢用盡所有意志去到人多嘅地方先暈低。中間佢嗌過兩次救命，但完全冇人理佢！後來媽咪個朋友嚟到先發現佢瞓咗喺度，就即刻送去醫院，去到醫院冇縫針只係止咗血，同埋住咗一晚。尋（前）晚已經返咗香港，依家雖然醒番，但個頭仲痛緊，最擔心係有後遺症同個腦積咗瘀血，要再去照腦。」
手機亦被搶
問到母親當時是否身光頸靚兼身懷巨款？許亦妮謂：「媽咪唔係着得好誇張，只可以話一睇就知佢係香港人。佢當時身上有一萬蚊現金，同埋有部新買嘅iPhone都被人搶咗，最慘係啲證件都冇埋，返香港時要經好多部門辦過晒啲手續先返到嚟，好麻煩！啲賊人都係求財啫，唔好攞晒人哋嘅證件！我覺得大陸人視生命好似爛命咁，真係好冷漠！」雖然母親大前日遇襲，但許亦妮因有工作在身不能離港，令她擔心不已。她寄望母親早日康復，早日將匪徒繩之於法。
Profile
姓名：許亦妮 英文名：Whitney
生日：1988年11月13日
三圍：35D、24.5、34.5
身高：5呎4吋半
銜頭：2011香港小姐季軍及「最上鏡小姐」
情史：參選港姐期間，除了男友Elson被揭是健身公司太子爺，還被爆與前男友親密照，又與唐貝詩緋聞男友孔樂勤等六名男子拍拖，故有「集郵港姐」之稱。
文：名人組