粉絲
粉紅色有淺、有深，而桃紅色、shocking pink又或粉色系都可歸納為粉紅色調，全都給人一種girly感覺，未必得人心，亦好蝦人着！星級形象指導郭慶彬大讚蔡卓妍（阿Sa）將這份girly味道淋漓演繹，霍思燕的barbie look則有壓場張力，不過羽翹與林莉卻娘味重，徐濠縈就過分古靈精怪！
霍思燕
感覺好barbie娃娃公仔，無論裙款同顏色都有壓場張力，最靚地方係完全凸顯到佢白滑肌膚，一個字：正！
阿Sa
褶裙款好易着肥人，好彩佢夠瘦，完全招架得來，着得好靚，令人眼前一亮！
鍾欣桐
本來裙款型格，可惜差在黑絲襪同桃紅色豬肉屐，好九唔搭八，若改襯黑色thigh-high boots會更trendy。
徐濠縈
粉紅紗衫係今季must-buy item，可惜襯紅色長手套與紅襪，好over done，感覺太古靈精怪，不過夠晒搶鏡。
羽翹
One-shoulder dress好飄逸，但佢着唔出仙女下凡嘅感覺，濃妝同淡雅色調嘅裙配合唔到，尖頭鞋亦太娘。
文詠珊
A-line裙嘅剪裁好簡單，望落去感覺好fresh，幾欣賞佢襯對彩藍色高跟鞋，令人睇得賞心悅目，如果佢梳番個貼直髮型去代替個掃把頭，相信成個look會更索。
林夏薇
只能夠用娘爆去形容，佢carry唔起條裙，着到好似上闊下窄感覺，效果好唔湯唔水。
莊思敏
粉色要好girly嘅女仔先carry好睇，但佢形象好中性，完全carry唔到，加埋一抽chunky飾物兼酥胸半露，焦點太多，加埋復古髮型，認真由頭到腳都唔靚。
林莉
一個「娘」字！首先髮型凌亂，加埋條設計複雜嘅裙款，成條伴娘裙咁已經唔夠討好，就算佢身材高挑都錯得怪相。
Ricky Kwok Profile
星級形象指導郭慶彬（Ricky Kwok）愛為一眾女星裝身扮靚，如李冰冰、張惠妹與徐若瑄等。他有自我一套的審美標準，曾到巴黎時裝周及高級女裝訂造服睇騷。現除為收費節目教人扮靚與配搭，還會為品牌籌備時裝騷。