鍾嘉欣 楊怡 歡送金牌監製
無綫行政主席梁乃鵬前晚設宴，歡送將離巢的金牌監製劉家豪及梅小青，四大花旦陳法拉、鍾嘉欣、楊怡及徐子珊獲「欽點」出席。家豪哥及小青姐強調不會「挖空」娘家，梁主席更表明隨時歡迎他倆回巢。
曾炮製《溏心風暴》及《宮心計》等熱播劇集的金牌監製梅小青及劉家豪，將於3月23日離開服務逾廿載的無綫，4月2日正式過檔now的戲劇製作部門。無綫行政主席梁乃鵬前晚專誠設宴為二人餞行，四大花旦陳法拉、鍾嘉欣、楊怡、徐子珊、資深藝員夏雨、米雪、關菊英、李香琴等均有出席。
不會挖空娘家
家豪哥與小青姐坦言不捨得TVB，又大讚梁博士大方：「主席親自署名邀請卡畀我哋，等我哋邀請想請嘅人嚟，真係好感動。」又以「萬寧妹妹」的金句「我有少少鍾意咗佢」來形容對主席的感覺。問到會否感動得欲簽回TVB？他倆說：「嗰邊簽咗兩年，到時再算啦！（挖娘家啲藝員過檔？）唔會，冇TVB就冇我哋，依家只係大個仔出去闖吓。（後悔離巢？）唔會，人生總要嘗試。」
珍姐唔妥冇份
至於梁主席亦大讚二人是出色監製，劇集亦屢創收視高峰：「如果出面嘅環境唔係咁好，TVB嘅大門隨時為佢哋而開。（擔心佢哋拉人走？）保證唔會。」又強調公司努力培訓新血，故不擔心鬧「監製荒」，更揚言日後不排除與二人作跨電視台的合作。
此外，騷長腿搶鏡的鍾嘉欣，感謝「劉梅」為她打造多個經典角色，如「常在心」及「Miss Koo」等，她說：「當年就係憑小青姐嘅《法證先鋒》成為宅男女神，衷心祝福佢哋。（如果佢哋撬你過檔會點？）同無綫仲有好長約，畀經理人搞啦！」而米雪大讚公司充滿後起之秀，新劇《大太監》亦沒因離巢潮而「飛紙仔」。
在歡送會上，出席高層計有共事多年的梁家樹、樂易玲，唯獨欠傳不和的高層曾勵珍，昨日梅小青在電話回覆說：「成個製作部咁大，好多人要慶祝，我會分別同佢哋食飯！」
文：影視組