Mika搵仔哭訴 Phoebe踩多腳

Phoebe師妹Mika前日於微博寫上「我決定離開了」，其後她所屬的模特兒公司發聲明即時把她雪藏，其經理人更指她因態度惡劣、扮大牌、揀工作等令公司非常不滿，故把她所有工作叫停，據知雙方現在「冇偈傾」，關係面臨決裂，雖然如此，Mika卻無損心情，昨日無工一身輕如常出街，更相約男友人於銅鑼灣行街兼歎下午茶，實行瘟仔過日辰！

行街散心

昨午約3時許，戴帽的Mika與男友人於銅鑼灣百德新街閒逛，兩人有講有笑，心情似未受雪藏影響，兩人先走進一手袋店睇手袋，其後再到附近的男裝店閒逛，於店內Mika更細心為男友人揀恤衫，最終未有購買便離開。

Mika忍唔住落淚。

Mika向男友人狂呻，愈講愈激動。

及後兩人轉到附近餐廳歎下午茶，甫坐下，Mika開始向男友人狂呻，見她愈講愈激動，七情上面，更不禁落淚。期間她更拿起電話不停按，再遞給男友人看，相信電話中是她與公司爭拗的短訊。男友人聽足Mika訴苦近個多小時，兩人才埋單離開。

另邊廂，Phoebe與Cassie昨接受訪問時與Mika劃清界線，Phoebe說︰「雖然同公司，但唔熟悉，我覺得佢好得人驚！」而Cassie則插爆Mika目中無人，她說︰「我覺得佢自視過高，目中無人，態度又差，真係好恐怖，生人勿近！」

文︰專案組