余文樂買花唔敢認
余文樂自從和黃伊汶分手後，單身多年一直未有新戀情，雖然阿樂多次公開表示恨拍拖，但身邊始終未見有新女伴，既靚仔又吸金的他，成為圈中的「筍盤男」。及至日前阿樂被踢爆夜會日籍模特兒松岡李那，兩人在多名朋友相伴下蒲至深夜，阿樂更負責送女方回家，立即被懷疑暗撻成功。
滿載而歸
疑似蜜運中的阿樂，約會松岡李那後，前晚上7時許，獨自一人於中環行超級巿場，專攻新鮮海產，揀完海膽再揀魚生、生蠔，其後更走到清酒專櫃，細心地向店員請教如何配搭食物，未幾買好兩大袋食品，阿樂仍嫌未夠完美，繼而走到店外的花店揀花，一副佳人有約的樣子，滿載而歸。及至發現有記者拍攝，阿樂依然好心情，一臉笑容地打招呼，繼而直接往停車場取車離開。
自認筍盤
被問到約會松岡李那後，買花又買美食是否再度有拖拍，阿樂哈哈笑嗌救命，並說：「救命呀！救命呀！成大班朋友出吓街好平常！我都話我冇拖拍，筍盤割價出讓啦。（你買花喎？）嗰紮明明係有啲顏色嘅草嚟！講極都唔信！」極力否認有新戀情。
文：追蹤組