周秀娜寫真施毛術 禁室陪浴
寫真女王降臨浴室！蟄伏一年周秀娜已蠢蠢欲動，打算今年再出寫真。向來諗頭多多的她繼攬枕後，欲推出一比一魔術毛巾寫真，遇水立即顯現娜姐全裸胴體，實行施「毛術」吸乾宅男荷包。今年寫真戰有周秀娜，戰情隨即刺激得多。
去年寫真戰既沒有Angelababy，也沒有周秀娜，幾乎悶出鳥來。Baby會否回歸寫真戰仍是未知之數，但去年同樣冇出寫真的娜姐已蠢蠢欲動，打算重奪寫真女王寶座。
繼前年玩3D寫真後，蟄伏一年的娜姐去年開始轉戰影圈，未知是否見宅男個個變晒餓男，據知她有意今年暑期重投寫真懷抱。周秀娜向來鬼主意百出，玩刷牙食雪糕不特止，連人形攬枕也諗得出，加上寫真賣個滿堂紅，難怪獲封寫真女王。據知，娜姐今年不只出書咁簡單，更打算推出毛巾寫真，毛巾濕水後會像魔法般顯現娜姐全裸胴體，十分香艷。據知，娜姐正考慮到斐濟取景拍攝。
戰況空前激烈
若然娜姐拍板施「毛術」，勢必再令寫真戰風起雲湧，加上「百果園咪神」陳靜、「爆E超蓮」鍾采羲、龐錢景峰兩名舊愛Mia和Mika已鐵定出書，而娜姐死敵「不倒胸」何佩瑜亦一心狙擊師姐，若加上Baby肯出山，今年寫真戰定必空前精彩。
記者致電娜姐，問是否今年再出寫真？她說：「點止寫真咁簡單，總之會令大家驚喜啦，公司嘅創作團隊都諗緊各種可行方法。」娜姐同時承認有推出魔術毛巾的打算，她說：「呢個係計劃之一，希望同大家有貼身接觸嘛！如果真係出，第一個會送畀林書豪（NBA球星）。」不過，她卻不肯透露會否全裸演繹，一切以美感為主。
香港搞見面會
問會否在港搞fans見面會？她說：「今年喺內地都搞過幾次見面會，一月去廣州同fans見面時，因為太多人，有關方面唔畀我哋喺商場搞，惟有移師室外嘅荔灣湖舉行。至於香港我都諗住搞，因為好耐冇同香港fans見面。」
文：專案組