楊千嬅：做artist要有火

入行十六年，依家對頒獎禮的看法已不同，不能用公平二字形容，它其實是一個巿場策略。以宏觀來看其實係經濟問題，娛樂圈是燒銀紙的工業，做一個歌手或公司要投資好多，但投資不一定有正常回報，當社會經濟低迷時，藝人的成敗就變得好現實，一舖唔得就無下次，形成惡性競爭，利益衝突大過創作的時候，令到media（媒體）跟唱片公司的關係有所改變。

要攞到獎為止

今日可以講這番說話，因為我已經得到過，所以可以話不在乎，但置身於當年的我，相信我仍然會在乎，一定想乜獎都攞。

依家我會同公司其他歌手講，我個態度好似好唔恨攞，但你哋乜獎都要恨，如果不恨點解要做artist？你不覺得自己係最勁嗰個，你做artist做乜？娛樂圈是一個長途賽，當你爭取不到獎項，你一定會o架，將這種感覺轉化成一團火去做得更好，反省點解你今日攞不到，要攞到為止，這樣對自己才有益。

35歲開始改變

而現階段的我，一切隨心情去做，但今日你問我還想去頒獎禮嗎？我會話你知「到」是一個支持態度，話我還是活躍中，但我不到不代表這幾年我無攞獎，不代表我的銷售好差，或我已無價值。

依家嘅我要學識欣賞人，但講易做難，曾經有位前輩跟我講過，想做有級數的人一定要有胸襟，講得出要做得到，識得欣賞別人的優點。但娛樂圈一定會有比較，要做到真的不容易，這是我35歲開始學做的事，好多人話做artist要有童心先會有創作能力，但都要成熟，才可以讓成功價值變得更高。

口述：楊千嬅　

筆錄：音樂組