林峯坐暖鬆人 嘉穎執二手櫈
林峯、官恩娜等昨日齊齊為新劇拍攝追捕戲，同樣受了傷的林峯及官恩娜可謂同病相憐。談到吳雨笑指「嘉穎要坐林峯嗰位」，林峯笑言已專誠替嘉穎坐暖張櫈，更揚言望躋身視帝之列。
林峯、官恩娜（Ella）、苗僑偉（三哥）、黃智賢等昨日為劇集《雷霆掃毒》拍攝一場追捕戲，之前坐骨神經受損的林峯表示，每星期都要治療一至兩次，他不諱言行和坐都會痛。而Ella日前拍此劇時都拉傷腳部肌肉，昨日拍攝時雖英姿颯爽，但停機後卻一拐一拐兼不時捽腳。
談到吳雨大哥日前在英皇春茗上，笑着鄭嘉穎坐林峯的座位，阿峯笑說：「我幫佢坐暖咗o架喇！幾開心，（同你爭無綫男歌手獎？）不嬲都唔Care呢啲，最緊要係可以同音樂班底做到目標，拍埋呢套劇，下半年會拍一兩部電影，亦都會拍內地劇。」記者笑是否他坐夠才讓給嘉穎坐時，他笑說：「我周圍走。（叫佢返去做視帝？）佢係我榜樣，我都希望可以加入視帝行列。」
官恩娜乘機混熟
至於Ella透露早前已認識林峯，但拍了此劇才熟落，記者指他們有共同朋友吳卓羲時，Ella說：「係TVB嘅共同朋友，原來佢可走搞笑路線！（佢撩你？）大家互撩對方傾偈。」
此外，三哥大讚此劇落重本，很多追車、槍戰戲，更指昨日整天跑上跑落，不過他表示應付到都會親身上陣，有熱身便可。說到老友黃日華已過檔王維基，問何時到他？三哥說：「我仲有一輪搞，同無綫仲有一段時間合約，一年拍一部劇，之前係同王生傾過偈，但未傾到價錢。（黃日華喺無綫唔開心？）唔係，佢想轉吓環境，而且嗰邊畀到比無綫更高嘅片酬。」
文：影視組