Twins力保4點 毛遮毛掩
入行逾十年的Twins以半裸造型拍攝全新廣東碟封套相，一個露臍、一個露背，僅以「飛鷹」遮掩胸前「4點」，再加上羽毛飄落營造效果，藝術與性感共冶一爐。但兩女自覺與性感扯不上關係，全裸必定趕客。
Twins相隔四年再出廣東碟《2-BE-FREE》，昨日舉行記者會造勢。為慶兩女過去一年得獎無數，大會特別以獎座砌成蛋糕山，並進行揭幕儀式。Twins的半裸巨型海報亦首度曝光，相中的鍾欣桐（阿嬌）正面露肚臍，蔡卓妍（阿Sa）則側身晒玉背，並配以「飛鷹」遮掩胸部。另一輯相則是Twins胸對胸緊緊抱住，意態撩人。
唔敢全裸怕趕客
Twins受訪時坦言拍照時非真空上陣，均穿tube top打底。攝影師為令她們拍照時更「放」，體貼地要求化妝及髮型師迴避，只留下攝影師及女助手。問到慣不慣半裸示人？阿Sa強調：「唔係露，係一件藝術嘅事。（會唔會再性感啲？）唔會，呢個已經係性感極限。」阿嬌透露和阿Sa半裸擁抱時抱得緊緊，問兩人可有被「頂親」？阿Sa笑謂：「梗係有啦！（邊個頂親邊個？）梗係我啦，仲使問？」
問到可考慮為慈善拍全裸照？阿Sa說：「我寧願捐錢，如果全裸就冇必要，都幾趕客！」提到不少女星曾為乳癌基金而全裸拍照，阿嬌謂：「唔會搵我啦！都冇人睇！係都搵model，佢哋身材好啲。」
阿Sa擸男友獎金
另外，阿Sa在英皇春茗任抽獎嘉賓，獲贈一萬元的幸運兒正是其男友陳偉霆，她說：「佢啲錢係楊生（楊受成）同大哥（成龍）捐出嚟。（錢歸你？）梗係啦！」提到男友拍新片將被人打傷下體，阿Sa拒回應，但阿嬌搭訕：「一定有保護，放心啦。」
文：音樂組