霆鋒闔家歡 栢芝冇得跟
謝霆鋒與張栢芝盛傳復合，近日霆鋒更頻頻於栢芝的億元豪宅世紀大廈過夜。而之前表示豪擲二百多萬與員工包島旅行的霆鋒，昨日終於啟程出發，同行有拉姑夫婦、四哥、婷婷與安志杰等闔家遊，連好友劉浩龍及鄭希怡都有份去，而一直恨復合的栢芝則不見影。
「鋒芝」屢傳翻撻，連月來出盡招數為求復合的栢芝，繼早前與兩子愈住愈近，搬往霆鋒位於金鐘的寓所對面，趁機朝夕相見，但栢芝被踢爆行蹤後即於月初急急與兩子遷入了億元豪宅世紀大廈，霆鋒更不時於上址過夜，兩人關係大躍進。為求復合的栢芝更事事配合霆鋒，不敢亂來乖乖做其賢妻良母。
劉浩龍鄭希怡隨行
而身為「PO朝霆」老闆的霆鋒，其公司盈利逾億元，去年公司亦勁賺，故他豪擲二百多萬元，昨日包機與一百二十多名員工往馬來西亞，包下該處的沙貝島旅行，霆鋒於中午約12時到達，同行還有拉姑及鬍鬚Kong、父親四哥，婷婷與男友安志杰，甚至好友鄭希怡與化妝師男友Andy、劉浩龍亦有份去玩，惟獨栢芝不敢死跟全程冇影。
世紀過夜否認同居
心情大靚的霆鋒表現興奮，與拉姑及四哥雞啄唔斷外，轉頭又與劉浩龍、鄭希怡談笑風生，並親自安排百多人影大合照，見記者在場亦笑笑口打招呼。問到他於世紀過夜，會否擔心被指與前妻復合同居，他說：「怕咩啫，始終佢哋搬咗屋，我點都要睇吓個仔喺邊，呢啲係我本分，（傳你哋同居？）我就答咗唔係喇，你哋鍾意點寫就點寫啦。」提及旅行原定於農曆新年出發，改期是因為避開栢芝時，霆鋒即表示：「遲咗去因為個島之前畀16個人包咗，我想成個島都係自己人玩晒，撞啱月頭公司有大Project，咪改依家先去。梗係賺錢先啦，今次包島包飛機，去到當地又租廿幾架車，使費加埋都成二百幾萬。」
問及於內地宣傳的栢芝是否已回港接手湊仔，他說：「唔，正常啦。就係佢去宣傳我咪要睇仔囉，成日上去煮早餐畀兩個仔食。」至於會否擔心栢芝帶兩個仔去找他，霆鋒十拿九穩說：「唔會啦。」看來為了復合的栢芝今次聽教聽話唔敢死跟，難怪霆鋒極為放心，舉家與員工盡享四日三夜的陽光海灘假期。
文、攝：追蹤組