JM難忘GaGa牛肉造衫
作為藝人，形象是相當重要，一個經典造型足以流芳百世；究竟藝人眼中的深刻造型又是誰？以出位形象見稱的Lady GaGa就成為了文詠珊（JM）及吳千語的最愛，二人均認為當中的「牛肉衫」更是一絕！而瑪莉蓮夢露的經典「吹裙」造型亦榜上有名！
文詠珊：着肉上身最勇
「我覺得係Lady GaGa嘅牛肉衫，覺得佢真係好勇敢同神奇！完全冇諗過可以着肉上身。我身為一個模特兒，着嚟影相都接受到，但冇諗過可以着住嚟出活動。」
杜如風：多變好玩至深刻
「我覺得係黃偉文，造型多變又好玩。最印象深刻係佢演唱會裏面，着咗一件香港夜景嘅衫，真係會着燈嘅！」
盧凱彤：為活動挺身而出
「令我印象深刻嘅係Coldplay主音Chris Martin，佢每次開巡迴演唱會鋼琴面及自己隻手都會畫fair trade嘅標誌，好欣賞佢為呢個活動挺身而出。」
高海寧：最愛紫荊俠
「最深刻係自己演嘅紫荊俠造型，一個好有善心嘅神秘女子，覺得好有意義！」
熊黛林：為愛犧牲靚樣
「最印象深刻係電影《畫皮》裏面周迅嘅角色，覺得佢係一個好有靈氣同埋愛嘅精靈，為咗愛就算變到好肉酸都唔計較，好鍾意呢個神話！」
林莉：要有女人味
「我覺得瑪莉蓮夢露掩住裙嗰個造型，真係好性感好有女人味，好值得我學習。」
吳千語：最重要carry到
「我覺得係Lady GaGa嘅牛肉衫。好想知佢點着，而且我覺得着衫係要個人carry到先得嘅，真係好適合佢。」
倪晨曦：着出自我風格
「我覺得係杜如風嘅桃紅色頭，睇完《風行全世界》，覺得佢好特別，有自己嘅風格。我性格就乖啲，好想似佢咁癲。」