型女星喱
喱士可說是時裝界歷久不衰的經典元素，近兩、三年各大時裝設計師就非常喜愛將喱士加入設計中，各地女星亦紛紛力撐。喱士予人感覺充滿女人味，但也可以很有型，Mix & Match出很多Style。名模陳嘉容就大讚「妙麗」愛瑪沃森的紅色喱士短裙Look少女味濃，而韓國人氣組合少女時代則舞台效果十足勁Eye catching。
愛瑪沃森★
一個字，正，着得好好睇，由佢細細個見到佢大個，由少女味到依家開始有韻味，但都依然Keep到青春Feel。短裙好有少女Feel，腰間嘅大蝴蝶加埋上身嘅喱士都好配合個Look。紅色喱士好難搵，係大膽創新嘅演繹。佢個妝同髮型都好襯，紅唇令佢好Sweet。
少女時代★
好靚，好好睇，成個Look都ok，好Eye catching，台上效果好靚，台下當然就誇張咗少少。好襯佢哋嘅Image，性感得嚟又Girly，熱褲襯長Boots亦係今季好Hit嘅打扮。
Cara G.★
條裙好靚，不過呢件西裝褸就令到個比例怪怪哋，一係唔好着件褸，一係就換件短身到胸線下嘅西裝褸。
羽翹★
幾靚，襯得幾好，係穩陣派嘅打扮。可惜個髮型太成熟，老氣咗少少，將啲頭髮放番落嚟會好啲。
許穎★
件Top、條裙同對鞋拆開晒會好靚，但佢咁混搭有啲怪，件Top同條裙唔襯，如果襯條Mini skirt或者Tight pants，再配對超高嘅高踭鞋，成個人嘅線條會修長啲靚啲。
鄭融★
條裙好靚，好襯佢依家一身健康膚色，同埋着得佢高啲瘦啲，Total look ok，幾靚。不過對鞋就唔係咁襯，條裙本身已經好多Details，對鞋又咁複雜就會令到個感覺好花，應該襯番啲設計Simple啲嘅高踭鞋，黑色或者裸色都可以。
賈曉晨★
條裙靚但係嘥咗，佢襯對黑色絲襪同對毛毛Ankle boots好怪，條裙長度過膝已經令到身形比例短咗，再加埋對Ankle boots就顯得對腳更短，除非本身對腳好修長先好咁着。
陳嘉容Profile
香港著名模特兒，曾為各大國際品牌行時裝騷，在時裝界打滾多年，對時裝方面的認識無論是理論還是實戰都難不到她，近年更為電視時裝節目擔任主持，化身Stylist教人配襯衣着打扮。