陳豪聽talk 學生妹搶見
陳豪、黃德斌、陳煒、關禮傑、韋家雄、簡慕華等前日為暫定三月尾開拍的無綫劇集《金枝慾孽2》作準備，齊集浸會大學聽一個有關崑曲的化妝及示範講座。據知今次演員的角色與上一次完全不同，當中陳豪會飾演一名大老倌，關禮傑則會演戲棚花旦，在第一輯飾演小祿子並死去的黃德斌，據知今次會演監犯。
晨早到達的陳豪，未上堂已被不少女學生上前要求合照簽名，甚受歡迎！對於在新劇中有新嘗試，陳豪則表示：「好開心，其實我鍾意睇大戲，今次係新挑戰，未知自己能否應付到，盡自己能力啦！到時可能都要自己親自唱。」說到首次跟陳煒合作，陳豪坦言開心，希望新配搭可帶給觀眾新鮮感。
陳煒冇冷落老公
而要反串演花旦的關禮傑則笑言自己劇中於台上是女人。他謂：「扮女裝都驚，驚好似以前拍《新紥師兄》咁中咗毒，講真今次真係要細心研究，都有啲壓力，除咗造手、唱之外，仲有好多其他嘢要兼顧。」
另外，陳煒前晚出席晚宴時，亦透露加入TVB後，將於三月正式開工拍《金枝慾孽2》，問到新劇只做配角會否不習慣？她就表示：「呢套劇係大製作，好多人恨都恨唔到。」她又表示只要有發揮，任何角色都想嘗試，亦未有因為工作忙碌而冷落老公。
文：影視組