吳家樂視網膜脫落險盲

吳家樂前日在微博上載一張留院相，惹來各方好友關注，擔心其健康狀況。昨日他再上載左眼貼上紗布的獨眼龍照片，並留言：「多謝大家關心！昨天做完手術！還要多瞓床！」原來他入院進行眼疾手術，目前已無大礙。其太太周蕙蕙鬼馬留言說：「你左眼見到鬼？看錯了，係我呀！」

幫仔沖涼狂標淚

昨日家樂接受電話訪問時，初時開玩笑說：「自己chok得滯，影相chok爆咗隻眼！」後來他正經講述為何入院：「大前日同仔沖涼時，突然發現左眼流啲水出嚟，轉頭就睇唔到嘢，當時有三分一格睇唔到。」原來去年他左眼已感不適，經醫生檢查後證實左眼有退化迹象，惟當時家樂認為眼疾未對工作出現太大影響，因而延遲就醫，至大前日險盲才即時入院。

家樂說：「當時仲自己揸車去醫院，個仔交畀老婆照顧，醫生話我五分一視網膜脫落，要即刻做手術，屋企都返唔到。醫生講個手術都幾大，要將上下眼皮擘開，將成粒眼珠攞出嚟，所以要全身麻醉。今日做完手術都全日瞓，成個人仲暈暈哋。」昨晚家樂在微博向各人報平安，多謝大家關心。

停工休養數星期

家樂坦言老婆初時有點擔心，目前無大礙後才放下心頭大石。問到可會停工休息？他說：「要休息幾個禮拜，依家隻左眼好似爆晒咁，全隻眼紅晒又未消腫。原本今日有個job要公司幫我推，主持嘅《今日VIP》都要停。」

文：專案組