陳慧珊口窒窒 認泵水撐老公

兩位人母陳慧珊及林嘉欣昨日出席護膚品牌活動，已申請破產的Flora老公兼經理人Mike亦有到場，但面對記者拍照時即擰歪面，其後知「走唔甩」才無奈被影。至於久未露面的Flora在台上甚為緊張，不時口窒，她表示女兒Mira將滿五歲，故可放心復出，對於被指急於搵錢，她說：「唔會理，咁多年都係咁做嘢。」

女兒仍讀國際學校

41歲的「愛夫號」Flora承認有在金錢上支持老公，但其他方面亦需對方支持，並表示為對方驕傲：「佢有為理想付出，依家只係暫時階段，我哋會積極面對，（破產？）唔係咁大嘅事。（感情更好？）不嬲都好好。」但Flora拒答女兒的學費是否構成壓力，只表示她仍就讀國際學校。

陳慧珊老公鍾家鴻對傳媒鏡頭相當避忌。

林嘉欣提起16個月大的囡囡即笑到四萬咁口。

提到工作大計，剛在內地拍劇的Flora表示不介意中港兩邊飛，並指now及城市電訊均有向她招手，但要先履行與無綫的部頭合約：「劇一定有機會拍，但未知係咪《衝上雲霄2》。」提到城電王維基出手闊綽，Flora表示不會只向錢看。

活動後，為慳的士錢的Mike駕駛老婆公司名下的小房車到中環，Flora亦先陪老公到目的地，之後才駕車返薄扶林寓所，足見夫妻情深。

林嘉欣想追個囝囝

同場的林嘉欣笑言擔任品牌的內地及香港代言人，兩份酬勞可幫補女兒的教育費，並透露16個月大的囡囡開始懂得說話：「都係單字，第一個字係嗌媽媽！好開心！（幾時追個仔？）都想！但驚講太多唔靈！」忙於排練舞台劇的嘉欣表示完騷後可專心湊女：「都想兼顧到工作，但要出埠嘅Job就唔接。」

文：影視組