草蜢「膊」擊唐英年：我哋有腰骨

容祖兒、林峯、Twins及草蜢等歌手前晚出席《IFPI香港唱片銷量大獎2011》，天后祖兒橫掃六獎，再度成為大贏家，而林峯則奪三獎成獎王。當晚雖為頒獎禮，不過台前台後的談話焦點，卻集中在特首參選人唐英年就僭建一事所發表的言論之上。

祖兒讚網友創意

日前唐英年現身交代大宅僭建地下王宮一事，卻聲稱僭建是太太的主意，隨即引來全城嘩然。草蜢前晚率先於台上致辭時寸爆：「我哋做音樂嘅人真係有膊頭同腰骨！」明顯言中有意，引起全場拍爛手掌。訪問時問到三子是否對該事件有感而發？自言是「百分百香港仔」的蔡一智謂：「唔係，只係覺做音樂嘅歌手要對樂壇有堅持。（弦外之音？）我講音樂啫，聽到有嘅都係你哋聽到。」並言會為樂壇付出全力及「做好呢份工」。

前晚的大贏家容祖兒亦被問及事件，她說：「純以事論事，如想成為領袖，做事應公平，等大家服。（冇腰骨？）睇咁多日嘅意見，佢呢方面有進步空間去改善，佢老婆好偉大。」說到近日不斷有網友改圖惡搞，問祖兒可有看過？她笑說：「有。（最鍾意邊張？）大黃蜂嗰張！引發起大家嘅創作，香港人創作能力高，好佩服！」

至於男歌手贏家林峯則表示：「以為樂壇或電影頒獎禮前先多新聞，原來政府都有，自己做讀者睇完就算。」提到網民改圖一事，他說：「冇睇，淨係知間屋好靚，我都想有。」而坐骨神經痛的他表示現錄音感吃力，問到會否影響生育？他說：「唔知，但會影響做大動作。」

前晚的頒獎典禮，台前台後均有人談論「僭建風波」。	唐家鬧出大風波，唐英年夫婦真是頭都大了。（設計圖片）	對於選戰風波，林峯表示自己乃讀者，睇完就算。

汪明荃彈反應慢

此外，汪明荃就唐英年的言論發表意見：「佢咁講唔係咁好，出嚟解釋係好事，等市民了解。」另昨日她於電台受訪時說：「事實就係事實，一家之主要出嚟承擔，男人出嚟會好啲，唐太好勇敢，值得大家尊重。」阿姐更大彈唐唐對危機處理得慢。

而Twins亦有留意事態發展，阿Sa說：「我覺得誠信好緊要，應該好好向香港人交代，已經唔係一個一家之主嘅問題。（如果佢當選會擔心？）凡事向好方面諗，正面啲。」

文：音樂組