福祿壽犧牲色相 比堅尼獻身

福祿壽扮女人見得多，但着比堅尼絕對是第一次！為了即將在紅館舉行的演唱會，三子連月來絞盡腦汁度好橋諗驚爆位，由於扮女人扮得太多，為加強新鮮感，王祖藍、阮兆祥及李思捷決定犧牲色相以噴飯紅藍綠（TVB台徽顏色）比堅尼造型現身紅館勁歌熱爆，驚嚇度爆燈。

喪食減肥餐

問到三人屆時會否剃腳毛上陣？祥仔笑謂：「唔使！我哋有『竅妙』，總之你哋到時睇會覺得我哋皮光肉滑。」為免身上肥肉過分「銀」眼，福祿壽連日來喪吃減肥餐，思捷補充說：「我哋仲一日一粒維他命C，以防感冒。」

王祖藍扮林峯跪地擺chok甫，膝頭哥都腫埋。

福祿壽的泳裝草圖，率先睇都已好爆笑！

三人繼續將無綫愛將林峯擺上枱，祖藍除會獻唱其回響極大的金曲《Chok》外，還會在台上濕身大玩林峯招牌歌《Let's get wet》，為維肖維妙。

跪到膝頭腫

祖藍不斷苦練林峯式chok甫，其中一個跪地動作，令祖藍叫苦連天：「呢個動作搞到我膝頭哥腫晒，真係林峯唔易做！」對於早前有指林峯拒做嘉賓救亡，祖藍說：「其實我哋啲飛去咗九成，唔需要救亡，而且我哋由始至終都無請過林峯做嘉賓。」三人又笑言演唱會幸得兩大天王「相助」：「好感恩可以用郭富城嘅排舞室練舞，刺激咗我哋嘅跳舞細胞。另外仲多謝張學友嘅啟發，我哋會效法佢叫啲粉絲以米代花，等我哋遲啲捐去食物銀行，一來可以做善事，二來環保。」

文：影視組