朱晨麗劈腿 港男李晉強變小三

應屆港姐朱晨麗與港男李晉強於大年初三,被本報獨家拍得在港鐵車廂內煙韌,令戀情曝光。昨日朱晨麗竟親口證實「一腳踏兩船」,與老外男友古思宇還未分手!兩男一女只會得出一個「嬲」字,朱晨麗似乎要盡早斬纜!

現年24歲的應屆香港小姐朱晨麗與同齡的香港先生李晉強,因合作而擦出愛火,秘密拍拖三個月。本報於年初三更獨家拍得二人在港鐵車廂內卿卿我我,猶如普通情侶一樣,眾目睽睽之下變「黐頭芒」竊竊私語,李晉強更一手拖着朱晨麗坐下,並將頭挨落女方的膊頭上,氹得朱晨麗笑逐顏開,甜蜜到爆!

傾得埋冇戒心

朱晨麗昨日以應屆香港小姐冠軍身份,陪同高層梁乃鵬出席無綫新春團拜,她被問到與李晉強拍拖一事,她否認說:「我哋唔係拍拖,因為我冇親戚喺香港,嗰日其實約咗一大班朋友食飯,咁啱只係影到我哋兩個啫。(佢挨落你膊頭喎!)佢都答咗係Hea住咁樣,其實朋友同朋友傾得埋,係唔會有戒心,咁啱影到啫,呢啲係影相嘅角度問題。」

提起「新歡」李晉強即時冧爆的朱晨麗難掩喜悅,但講起「正印」烏克蘭籍男友古思宇時,便口窒窒兼「變臉」,收起笑容說:「點講呢……都仲係嘅(指拍拖)。」

唔怕男友呷醋

雖然朱晨麗與李晉強拍拖斷正,但舊愛情絲仍未斬纜,擺明「一腳踏兩船」,但她卻死撐說:「每個人都會有男仔、女仔朋友,如果只係一齊玩都可以咁講,仲得了嘅。(李晉強有意追你?)吓……朋友嚟啫,呢方面你哋要問番佢喇。」朱晨麗自辯與李晉強只是正常的朋友往來,相信正印男友不會吃醋,更沒有必要解畫。記者再問到為何當日「斷正」後彈開兼驚惶失措?她說:「唔係驚青,因為嗰日冇化妝啫,Artist冇理由唔化妝上鏡嘅。」

至於被無綫安排到藝員訓練班上堂的李晉強,日前放學後,與普通員工一樣要逼港鐵,沿途他戴上耳機不停講電話,更講到七情上面,表情多多,似乎是與朱晨麗談情。其後李晉強沿港島線過海,直到銅鑼灣站落車後,步行往中華遊樂會。

採訪:影視組

第一手消息請下載on.cc東方互動iPhone / iPad / Android Apps