鄧萃雯「亂世論」 慘成同志公敵

港台節目《自己人》以探討同志文化話題為主，前晚主持梁兆輝、Tanner、嘉賓同志小說作家葉志偉等輪插曾奪視后的鄧萃雯，事緣雯女在《金枝慾孽2》與蔡少芬咀嘴的宣傳片，甚有斷背意味，不過她稍後接受電台訪問時，卻稱如果劇集推崇或鼓吹斷背就唔會拍。一眾主持大數雯女說：「佢仲話做演員要有社會責任，依家世界好混亂，唔應該拍呢類嘅戲，仲有啲宗教因素，因為本身係基督徒。」

「不配做演員」

主持們大讚雯女在《金》劇演技非常精湛，不過轉頭即狂插雯女的說法令他們覺得好「」耳，好似被人插了一刀：「佢唔係話劇本差唔做，佢係話演同志覺得會推廣、推崇，風氣唔好，搞到世界好亂，點解演同志角色會亂先？依家香港好亂咩？全世界都有攣人呀，大佬！」

梁兆輝更直斥雯女偽善：「我絕對尊重你宗教身份，有自己原則同唔做乜嘢，但唔能夠接受你當中所講嘅偽善，你扮有社會責任，其實製造社會歧見，單單演同志有違你信仰、聖經，任何角色都有機會違反十誡，咁你只可以演聖人、上帝。」自言在演藝學院畢業的Tanner怒罵：「好嬲！唔該你唔好歪曲咗，演員嘅社會責任係了解世界發生乜事，要尊重每一個人，唔好邊緣化某啲人。」

言論激烈的梁兆輝除了開咪狂插外，還在《自己人》facebook專頁踩多雯女一腳：「因基督徒身份而拒演同志角色？那你根本不配做演員！」網友亦留言聲討：「曾幾何時，我見她常在基吧出沒！」、「罷睇鄧萃雯」等。

蔡少芬斥無聊

記者聯絡雯女，但至截稿前未覆，而蔡少芬昨日帶女兒去老公家鄉重慶過年，她接受電話訪問說：「我覺得冇嘢好回應，好無聊。」問身為基督徒的她是否抗拒演同志角色？她說：「演戲係人性演繹，我係唔介意。」同樣是基督徒的李亞男力撐雯女：「自己拍戲以宗教原則行先，斷背盡量唔接，我覺得雯女好慘，會幫佢祈禱。」

文：音樂組