林峯子珊龍咁威 Chok走爛桃花
林峯與徐子珊去年事業一帆風順，荷包非常腫脹，理應飲得杯落，不過感情方面依然未有着落。阿峯雖覓得女友但未能開花，子珊亦受緋聞纏身煩惱不已，故這對苦命「兄妹」趁龍年來臨到桃花園努力兜圈兼Chok甫士，希望Chok走爛桃花！
愛情事業兩得意說得容易，但到真正實踐時，卻又未必人人均可兩全其美。阿峯與子珊去年事業發展不俗，前者歌影視三線齊起飛，更奪下大大小小多個獎項，就連金曲金獎也被他攞埋。子珊則一年內推出五劇，兼且於劇集效應帶動下人氣急升，商演及廣告工作接到冇停手，兩兄妹風頭的確勁！
喪兜圈增姻緣運
不過二人愛情卻未如事業般順利，阿峯去年初經歷情傷，子珊則與吳卓羲的緋聞沒完沒了，後來更被指介入卓羲與張馨予的戀情。雖然子珊已多次澄清，但傳聞依舊鬧得熱烘烘，令她不勝其煩。
為踢走爛桃花，阿峯與子珊日前兄妹檔出動，花上個多小時車程踩入元朗桃花園，實行轉番個正桃花運。兩人甫到場即喋喋不休講不停，當看見在場數百棵桃花時，他們即眉飛色舞，各自挑選心水桃花樹，並以順時針方向兜圈，如是者兜了好幾轉，又與桃花樹抱抱，實行喪吸桃花味以增姻緣運。期間二人拿起道具自娛，阿峯先將炮仗掛膊頭，及後又把黃金元寶放在子珊頭上，又研究如何chok靚甫士，兩人你一言我一語，充斥着一片歡樂笑聲。
開心「兄妹」合作
阿峯坦言希望龍年繼續向歌影視三線發展，基於摘下金曲金獎惹來不少聲音，促使他更加倍努力做好自己。他謂：「嚟緊會錄廣東碟，今次會同唔同音樂人合作，希望有新火花帶畀樂迷，同埋又有新劇開，同阿妹（子珊）一齊拍，電影就仲睇緊劇本。（感情呢？）呢啲我一路都順其自然，我相信要嚟就會嚟，避都避不到。」
子珊則謂：「好開心同阿哥開工，遲啲又一齊去澳洲做佢演唱會嘉賓，龍年梗係希望繼續工作不斷。拍拖係需要，不過都要揀個啱嘅對象，急唔嚟。」
文：影視組
攝：李柏儒
場地：財利（花圃）農場
服裝：中藝
林峯髮型：DY @ Hair Corner
徐子珊髮型：Maggie @ Kim Robinson
化妝：Raymond Yip