蔡楓華:阿梅孩子氣爭畀錢

我真係冇諗過張國榮會自殺，反而邊個有機會呢？我覺得會係Danny仔陳百強，佢係一個好情緒化同感性嘅人，佢遇到咁嘅不幸，個人認為係性格使然。其實我同張國榮、Danny仔真係好好朋友，以前成日跳舞，當時仲有梅艷芳四個人一齊落D跳舞。

受歡迎過Leslie

大家因為好鍾意音樂，又貪玩，咪成日落D囉！講跳舞當然係Leslie同阿梅最好，我同Danny仔係弱少少，不過都吸引到其他人向我哋行注目禮，有時我哋仲受歡迎過Leslie o架！當年我哋仲未好紅，唔會搵好多，但每次埋單都各不相讓，爭住畀錢，阿梅比較孩子氣，話要巾幗不讓鬚眉喎，總括嚟講佢埋單次數最多。

香港樂壇損失

就係因為成日乜都爭，當時大家都知道喺樂壇會有一番龍爭虎鬥，因為大家都係歌手，為事業真係冇辦法，就算係朋友都係咁話。我覺得佢哋三個的離開係香港樂壇嘅損失，佢哋都係天王巨星，絕對係成功藝人。尤其係Leslie，佢喺舞台表演及拍戲方面都好出色，係一個不可多得嘅演藝天才。

依家佢哋三個都離開，真係令人唏噓，以前開演唱會請嘉賓，唔使諗喇一定會請呢幾個老友，依家要搵嘉賓真係頭痕。但我會覺得佢哋三位有個任務畀我完成，希望可以延續佢哋演藝生命。

口述：蔡楓華　筆錄：專案組