帽王風範
今個冬天，時裝界掀起一股戴帽熱，帽子能為一身打扮畫龍點睛，即使一套簡單的服裝，加頂帽子已可令整體感覺煥然一新，令total look變得更fashionable。帽子還可用來遮醜，當不想整理髮型時戴上帽子，即成了最佳的裝飾。圈中一眾藝人不論男女均力撐這股戴帽熱，名模陳嘉容就大讚郭富城的帽子look有型突出，甚具舞台王者風範，李冰冰則充滿新鮮感！
郭富城 「無得頂，成個look令人覺得好豐富，好精彩，唔會悶，好有舞台王者嘅風範，好突出，好有型！佢頂帽同件褸都係有啲羽毛嘅details，好襯。」
容祖兒 「好靚，如果唔係頂帽，成個look會無咁balance，條裙好花，再加埋對絲襪，視覺效果好豐富，原本金色頭髮唔係咁襯條裙，深色嘅髮色會襯啲，但佢戴咗呢頂帽就變得好襯，好好睇，total look感覺好舒服。」
吳雨霏 「幾cute，喺頒獎禮呢個場合着都適合，但有啲too much，裙腳感覺有啲雜亂。如果無咗呢頂帽個look會好娘，隻顏色本身都難carry，頂帽係亮點，成個造型即刻變得青春有型。」
張學友 「有自己獨特嘅個性同style，打扮恰到好處，頂帽同件格仔外套好襯，好有畫家feel，成個total look好match，感覺幾得意，好討好。」
陳妍希 「好有少女味，但成日都戴呢頂帽出嚟，好悶。佢可以着得girly啲，有番自己嘅style，雖然佢要塑造一個清純學生情人嘅形象，但都唔使個個look都一樣。」
吳卓羲 「娘到爆，頂帽都OK，顏色都match到，係件皮褸出咗事，oversize嘅皮褸已經唔興，可以換件slim cut嘅，佢本身身形夠高大健碩，絕對有條件着修身cutting。」
張馨予 「好唔得，浪費晒佢嘅靚樣同好身材，條四個骨leggings同對boots完全唔襯，顯得佢對腳又肥又短。換對黑色leggings襯番對黑色boots，簡簡單單仲好。同埋頂帽係幾年前嘅trend，依家過晒時。」
李冰冰 「好有型，好難得佢會咁樣着，同平時個Look完全唔同，好有新鮮感，着得女性化嘅衫多可以轉一轉形象，幾得意，都好girly，佢carry到呢種style。」
陳嘉容小檔案
陳嘉容，香港著名模特兒，曾為各大國際品牌行時裝騷，在時裝界打滾多年，對時裝方面的認識無論是理論還是實戰都難不倒她，近年更為電視時裝節目擔任主持，化身stylist教人配襯衣着打扮。