黃貫中（Paul）昨日出席戶外Live騷，對於再傳出他與拍拖多年的女友朱茵將於年底拉埋天窗，Paul說：「年年都咁傳，都視佢為老婆。（趕生龍B？）我唔覺得雞B、鼠B有咩唔同，我拒絕生肖歧視。」
此外，Paul早前未能憑hit爆電視劇《天與地》主題曲入選勁歌頒獎禮，令不少網友替他不值，Paul說：「唔需要戥我唔抵，因為我冇呢個感覺。」至於林峯憑《Chok》奪得「金曲金獎」惹爭議，Paul大讚對方說：「我有聽過，睇得出佢好用心，唔好怪佢。」
