Jeana硬撬娜姐 撩Avis上床

「百果園咪神」DaDa、Jeana、連詩雅昨於中環一間酒吧出席「《喜愛夜蒲2》粵港澳演員選秀」活動，吸引蒲男及逾二十位蒲女到場應徵，蒲女個個低胸、短裙，各出其謀務求爭得新片演出機會，其中周秀娜（Chrissie）男友陳偉成（Avis）、「爆E超蓮」Iris、「混血E神」Monna亦是座上客。

懶理女友唔高興

Jeana曾與師姐周秀娜傳不和，但昨日見到周的男友Avis現身面試，竟大為嗒糖，她說：「我都唔知佢嚟，好surprise，陣間會加佢分，我仲游說緊導演畀佢同我演對手戲。（床戲？）唔一定床嘅，衣櫃、梳化都得。我今次做評判之餘，順道睇吓有冇高大又靚仔嘅男仔。」Avis則講明已向女友備案：「Chrissie知我嚟面試，我哋有溝通，不過我唔敢同佢講現場好多靚女。（唔擔心女友唔鍾意你拍親熱戲？）我唔care佢鍾唔鍾意，我care邊個做對手多啲。（Jeana呢？）都係工作啫，熟嘅仲好，易溝通。新年希望同Chrissie去旅行，但佢未必有假。」

周秀娜男友Avis	DaDa前晚行騷表現淡定有台型。	陳靜（左起）、連詩雅和Jeana同場競艷，各不輸蝕。

陳靜盼騙徒蒲頭

DaDa雖以低V裙上陣，始終不敵一班落力賣肉博出位的後生女，她說：「我唔舒服，隻眼發炎，係唔夠瞓，身體發出警號。（又破財又傷身？）我被人騙財件事發生咗半年，本來唔想講，但發現有太多人被呢個女仔呃，所以想提醒各界提防。（許穎笑你蠢？）我唔熟佢，唔知佢諗乜，我只係交個心出嚟信朋友。（考慮報警？）我最想個女仔出嚟交代番件事，佢依家人間蒸發，我怕佢出咗事，我識咗佢年半，我係真心相信佢對我好，可能一時動歪念。」

另外，DaDa前晚為時裝騷擔任模特兒，期間不慎露底。問到會否介意大家集中其身材，她笑言：「之前建立嘅形象，好難突然轉行清純，如果係咁都好得人驚。」

文：影視組