Eason唔忿輸：我係大中華歌手
樂壇頒獎禮昨晚落幕，陳奕迅（Eason）獲十二個獎後止步，祖兒成為終極大贏家！前晚祖兒在澳門開騷表現風騷，得戚表示已不是第一次贏老友Eason，並叫他不要失望，不過Eason亦唔忿輸，笑言已升呢為大中華歌手。
【呂曉風澳門直擊】容祖兒和陳奕迅前晚為了爭做今年「獎霸」隔空互寸，Eason前晚在《十大中文金曲》共擸5獎，他自豪地表示在新城、商台和港台三個頒獎禮上，共獲十二個大獎。不過其實他的擸獎行動在前晚止步，身為「四大」歌手的他冇份競選昨晚無綫的《十大勁歌金曲頒獎典禮》，因此勢必被祖兒爬頭，而前晚身在澳門開騷的祖兒亦風騷寸Eason：「唔好失望呀吓！」
與觀眾分享喜悅
祖兒前晚在澳門舉行的《Number 6演唱會澳門站》演唱會，撞正《十大中文金曲》頒獎禮，祖兒表演期間亦緊張問台下粉絲賽果，完騷後她接受訪問時，對於共擸四個大獎表示好開心，更難得的是可以與觀眾一齊分享得獎喜悅，問到缺席可會擔心港台嬲？她說：「事前唔知呢一日撞正，相信港台都好明白。」提到經過昨晚無綫頒獎禮後，今年贏得的獎項會多過Eason，她得戚地說：「係咪真o架？有少少開心啦！」
祖兒還得戚表示已不是第一次贏Eason：「梗係贏過，唔係第一次！（點安慰佢？）唔好失望呀吓！」對於有傳Eason和古巨基明年不參與頒獎禮，她踢爆Eason反口：「佢依家又話諗一諗先，唔好以為女人善變，男人都好善變，基仔我就搵日探究一下佢內心深處先得。」
人到40要減肥
而Eason在港台慶功宴上，表示經過三個頒獎禮後已經獲得共十二個獎，他抵死地說：「唔知多唔多過祖兒呢？我唔係亞太區，我已經係大中華歌手。」又笑指自己現時經已「升呢」。
Eason日前表示會對有傳會淡出樂壇頒獎禮的古巨基作鼓勵，他稱有問過基仔本人，得到他親自答覆：「佢話唔係，應該係誤會。」同時Eason又透露今年的個人目標是減肥，目前180磅的他，希望減走20磅，他說：「接近4字頭，應該要注意健康，人健康唱歌都大聲啲。」