朱玲玲做奶奶開心 買定首飾

最美麗港姐朱玲玲昨出席慧妍雅集30周年記者招待會，甫現身即吸引記者上前恭喜她十月娶新抱，她雖表現錯愕，但全程笑容滿面，還着記者問番當事人，但明言會送首飾給未來新抱，間接證實了婚期。問到兒子有否就結婚一事向她詢問意見？她即笑說：「佢要問時就會問，唔好逼佢啦！（覺得晶晶呢個新抱點？）好呀，佢哋都一齊咁多年，夾先會一齊。（係咪傳聞中結婚會擺幾日酒？）我唔知，報紙雜誌寫，你哋仲清楚過我。（就做奶奶開唔開心？）做得媽咪嘅，做奶奶都會開心。（想抱幾多個孫？）冇諗過，我都鍾意小朋友，唔好畀壓力佢哋啦！」

見過雙方家長

當問到有否準備龍鳳鈪？她表示：「佢有計劃，我送少少嘢畀佢哋就一定要，（晶晶值幾多分？）100分啦，（佢為人呢？）佢梗係成功啦，佢有咁多金牌就已經證明咗佢冇浪費童年，佢都好斯文。（晶晶話唔只生一個？）冇問，佢哋有本事啦，生小朋友好辛苦，佢哋有責任，又應付到就得。」她又坦言二人拍拖多時，一定有見過雙方家長。此外，問到早前霍家爭產案，她表示沒有跟進事件，唯一可以做的就是叫囝囝不要太大壓力。

晶晶	左起：曹敏莉、楊婉儀、陳法蓉可說是美麗與智慧並重。	王愛倫（左）與吳婉芳出席支持慧妍雅集30周年。

趙雅芝等通知

同場的趙雅芝被問到有否恭喜朱玲玲做奶奶時，她說：「頭先冇時間添！如果係真會恭喜佢，（你自己係咪都心急做奶奶？）我等通知咋，等佢哋決定。」她透露在慧妍達30年，指會員都好團結，自己一直得家人支持。而出席的歷屆港姐包括有陳法蓉、楊婉儀、曹敏莉、吳婉芳、張嘉兒、王愛倫等。

文：名人組