古巨基靠眼淚釋放負能量

曾經被人封做「喊包」的古巨基,那些年的經典「喊樣」令大家記憶猶新,認為自己屬於感性的基仔,自爆看卡通片都會喊一餐,他覺得喊是一種最佳抒發的渠道,透過眼淚釋放負能量。

喊包?未稱得上叫做一個綽號,只是曾經有些畫面令大家好記得,97年「叱咤」頒獎禮在大球場舉行,係我第一次攞男歌手獎,(當時基仔激動得伏在欄杆上開心得喪喊),另一條片係04年同樣係「叱咤」頒獎禮,憑《必殺技》奪得「我最喜愛歌曲」,(他在台上狂喊哭着說我真係好鍾意唱歌),令大家印象尤深,但我自己睇番一些喊的片段就覺得好核突囉。

平時同朋友去睇戲,我都係唯一一個男仔會因為套戲感人而喊,有時在網睇到一些人轉發的短片,我都會喊。最近一次喊係睇到一段講述一隻扶助犬同佢主人的真人真事的短片,自己喺屋企都忍不住喊,以前甚至睇卡通片都會喊,好似《再見螢火蟲》等,其實我不是愛喊,我認為自己只是屬於感性。

時間證明一切

上次開演唱會前,有粉絲留言問我:「基仔你今次會唔會喊?我好想睇你喊喎!」哈哈,大佬呀,你睇我唱歌定喊?喊不是表演項目,真的好搞笑,可想而知歌迷都知我個人忍不住。我不介意被人叫喊包,都是一個名而已,喊不關懦弱事,我覺得喊是好事,是一種抒發,有時都會好想睇一套電影等自己喊吓,在適當時可以抒發下,以眼淚釋放負能量,令自己變得更樂觀。

相反平時我不會為工作壓力而喊,即使遇上不快的事,我都未必喊得出,但試過一次是被人誤解而喊,當時我又不能夠解釋,搞到個人好唔開心而喊出來,事隔幾年大家終清楚了解成件事,在這行經歷過這麼多,我明白到時間真是可以證明一切。(完)

後記

小記跟基仔做呢個連載訪問糾纏了近兩個月,因為基仔實在忙得緊要,難得約實訪問,又因為基仔跟小記相識多年,談天笑說吹水多過訪問,結果小記要跟基仔在電話中補問兩次,不過基仔好好,有問必答,尤其是跟得力助手Lorraine的感情問題,他也盡量吐真言滿足小記交「功課」,令小記滿心感激。

口述:古巨基 筆錄:音樂組