周秀娜凍又dry冇仔陪
今日是普天同慶的聖誕節，小朋友就最開心有禮物收，雙雙對對的情侶亦早已安排節目歡度，實行過個浪漫溫馨的難忘聖誕！圈中的名人藝人也不例外，同表示在這個開心的節日裏，都曾做過瘋狂、浪漫及刺激的事。羅霖婚前就試過與空姐同事在酒店房開P玩遊戲兼飲酒，結果個個變花面貓。而周秀娜卻搵錢至上，趁黃金檔到加拿大登台，又凍又dry，娜姐說當時好想將男友打包去陪她！
男士用品活動
周秀娜：「上年聖誕我去咗加拿大登台，過咗個凍到癲同dry爆嘅聖誕。嗰陣時我真係好想將男友Avis打包過去陪我。」
護膚品活動：貝安琪盒中有禮
「最難忘係細個嘅時候好想有個Game Boy，爹哋一直唔畀，終於有年聖誕，佢送咗好大盒禮物畀我，裏面有好多個盒，我拆咗好耐最後見到原來係我鍾意嘅Game Boy，真係好開心，完全估唔到。」
鍾浠文收99支玫瑰
「讀書時，前男友曾在聖誕日揸車同我去海邊，每揸一段時間就停一停，送我一支紅色玫瑰花，總共收咗99支，我覺得好浪漫好難忘，後來我將啲花做咗個相框掛喺牆度。」
趙嘉懿巴黎坐摩天輪
「有一年聖誕喺巴黎過，當時落住大雪，我同三位朋友去坐摩天輪，由於着唔夠衫，好凍，但喺摩天輪上俯瞰周圍景色，好靚，好感動。」
電影首映：羅霖畫花面玩天光
「最瘋狂嘅聖誕梗係結婚前，嗰時我係空姐，有年聖誕出trip，我哋成班空姐喺酒店一間套房開party，又飲酒又玩啲好瘋狂嘅遊戲，仲畫到大家成個花面貓咁，玩到天光。婚後生埋小朋友當然唔會啦，過時過節就係陪佢哋。」
徐靖雯冒險滑雪
「有年聖誕我同班朋友去北海道滑雪，但我唔識滑，佢哋仲丟低我一個喺度自己學，最後都畀我學識咗，仲唔怕死滑落山，認真大膽，不過滑落去嗰下好刺激，好鍾意嗰種速度感。」
莊思敏唔抵之旅
「通常聖誕我都係陪屋企人過，最瘋狂就未試過，最唔抵就有。有年因太遲決定出埠，結果book唔到機票，最後惟有去澳門，點知酒店房要三千幾蚊一晚，真係好唔抵，等如去一次東南亞之旅。」
婚紗騷：趙哲妤熱辣辣過節
「有一年去咗馬爾代夫旅行，點知曬到成身黑晒，嗰時仲係要選美，真係印象深刻，過咗個熱辣辣嘅聖誕。」
區文詩街頭頻撲
「有年同Stephy及一個男性朋友好即興話開party，我哋24日嗰日仲瞓到好晏，plan都冇plan就去買嘢，點知喺街截咗兩個鐘都冇的士，真係過咗個頻撲嘅聖誕。」