羽翹為食聖誕約羅力威聯誼

歌手羽翹身材纖瘦，原來極之擦得，她表示大時大節都會擦餐勁，與朋友慶祝一番，十分為食的她日前更提早食聖誕大餐，並點了成枱食物，豬、牛、羊、雞、魚樣樣叫齊，一副滿足的樣子，她說︰「我一個人可以食得晒，自己特別鍾意呢個意式香草焗羊架，平時都會喺屋企煎羊架食，唔諗會唔會肥喇，食得是福呀！」

前度送溫暖牌

往年的聖誕節，羽翹坦言必定找家人和朋友食飯，她指年底一定要食得夠豪獎勵自己。問有否難忘聖誕節？她說︰「之前拍拖都唔係好浪漫，不過我記得好耐之前收過男朋友送嘅溫暖牌頸巾，真係好開心。」

過往少有浪漫聖誕的羽翹，今年會約一班朋友慶祝。	自言食量驚人的羽翹，不擔心聖誕節狂食而變肥。	羽翹笑言若有時間會跟緋聞男友羅力威約會。

羽翹透露今年聖誕節有一日假期，她會好好把握，提到會否與緋聞男友羅力威於聖誕節約會，她甜笑說︰「哈哈，都會聯誼吓，睇吓大家時間夾唔夾啦，大家都咁忙。」她直言正在計劃如何度過，問是否過二人世界時，她則說︰「會同朋友一齊過，應該會有男有女，一大班唔同嘅朋友。」

場地︰ANA Oyster & Grill

髮型︰Jay Yeung@Hair Corner

化妝︰羽翹@avaliu.com

服裝︰SingleLife DS

文︰專案組 攝︰沈健程